Қўқонда эр хотинини ўлдириб қўйди. Келишмовчилик аёлнинг Туркияга кетмоқчилиги билан боғлиқлиги айтилмоқда

17 март куни тушдан сўнг Қўқон шаҳрининг «Азизтепа» МФЙда яшовчи эр Д. рафиқаси З.ни мих суғурадиган асбоб билан бошига уриб ўлдириб қўйган. Келишмовчилик аёлнинг Туркияга кетиш истаги билан боғлиқлиги айтилмоқда.

Қотиллик фактини шаҳар ИИО ФМБ ҲПБ бошлиғи Иқболжон Тожибоев Kun.uz'га тасдиқлади. Унинг айтишича, Азизтепа маҳалласида бўлган воқеада эр ўз аёлини «оилавий келишмовчилик сабаб» уриб ўлдириб қўйган.

«Эркак ҳозир эҳтиёт чораси сифатида қамоққа олинган. Дастлабки тергов ҳаракатлари олиб борилмоқда», – деди Иқболжон Тожибоев.

• Хабарнинг дастлабки таҳририда Қўқонда коллеж ўқувчиси дўстини пичоқлаб, ўзини поезд тагига ташлагани, расмийлар бу маълумотга изоҳ бермагани айтилганди. Kun.uz кейинчалик Қўқон шаҳар ИИБдан олган маълумотга кўра, ҳақиқатан ҳам коллеж ўқувчиси танишини пичоқлаб қўйган (жабрланувчи ҳаёт), аммо шундан кейин ўзини поезд тагига ташлагани ҳақиқатга тўғри келмайди.