Самарқандда ис газидан 4 киши вафот этди

Самарқанд шаҳрида ис газидан 5 киши заҳарланган ва улардан 4 нафари вафот этган. Бу ҳақда вилоят прокуратураси маълум қилмоқда.

Маълум бўлишича, 28 март куни соат тахминан 11:00 ларда Самарқанд шаҳри «Мақсуд Шайхзода» маҳалла фуқаролар йиғини, Лоҳутий кўчаси 31-уйда вақтинча яшовчи 5 нафар шахс хонадонда ўрнатилган иситиш печи (голланд печи)дан ис гази ажралиб чиқиши натижасида заҳарланган.

Оқибатда, 4 нафар фуқаро вафот этиб, 1 нафари кучли заҳарланиш аломатлари билан Республика шошилинч тез тиббий ёрдам илмий маркази Самарқанд филиалига ётқизилган.

Қайд этилишича, мазкур ҳолат юзасидан Самарқанд шаҳар прокуратураси томонидан терговга қадар текширув ҳаракатлари олиб борилмоқда.