Тошкент вилояти «СЭС» бўлим мудирлари пора билан ушланди 

Маълум қилинишича, Бош прокуратура ҳузуридаги департамент ҳамда Давлат хавфсизлик хизматининг Шайхонтоҳур туман бўлимлари томонидан тезкор тадбир ўтказилган.

Тадбир давомида, Санитария-эпидемиологик осойишталик ва жамоат саломатлиги хизмати Тошкент вилояти бошқармаси бўлим мудири Х.Ф. “X.D.” хусусий корхонасига қарашли, Ўрта Чирчиқ туманида жойлашган ер майдонидан олинган намуналар бўйича эпизотик касалликлар мавжуд эмаслиги тўғрисидаги хулосани ижобий ҳал қилиб бериш эвазига 800 АҚШ долларини пора тариқасида олган вақтида ушланган.

Бундан ташқари, Х.Ф.нинг кўрсатувларига асосан тадбир давом эттирилганда, бошқарманинг юқумли касалликларга хулоса беришга масъул бўлими мудири Р.Х. Х.Ф.дан 400 АҚШ долларини пора тариқасида олган вақтида ашёвий далиллар билан ушланган.

Мазкур ҳолат юзасидан Х.Ф. ва Р.Х.га нисбатан Жиноят кодексининг 210-моддаси (пора олиш) билан жиноят иши қўзғатилган.

Ҳозирда тергов ҳаракатлари ўтказилаётгани айтилади.

Аввалроқ, Чирчиқ давлат педагогика институти кафедра мудири 2 000 доллар билан ушлангани хабар қилинганди.