Давлат бюджетини тузиш ва ижро этиш қоидалари эълон қилинди

Молия вазирининг “Ўзбекистон Республикаси давлат бюджетини тузиш ва ижро этиш қоидалари тўғрисидаги низомни тасдиқлаш ҳақида”ги буйруғи лойиҳаси эълон қилинди.

Низом Бюджет кодексига мувофиқ Ўзбекистон Республикаси давлат бюджетини тузиш ва ижро этиш қоидаларини белгилайди.

Давлат бюджети давлат пул маблағларнинг марказлаштирилган жамғармаси бўлиб, молия йили мобайнида даромадлар манбаларини ва уларнинг ҳақиқий тушумлар миқдорини, шунингдек аниқ мақсадларга ажратиладиган маблағларнинг сарфланиш йўналиши ва миқдорини кўзда тутади.

Давлат бюджети қуйидаги даражадаги бюджетлардан иборат:

республика бюджети;

Қорақалпоғистон Республикаси бюджети, вилоятлар ва Тошкент шаҳар маҳаллий бюджетлари.

Қорақалпоғистон Республикаси бюджети тузилмасига Қорақалпоғистон Республикаси республика бюджети, Қорақалпоғистон Республикаси туманлари ва шаҳарлари бюджетлари киради.

Вилоятлар маҳаллий бюджетлари тузилмасига вилоят бюджети, тегишли вилоятлар туманлари ва шаҳарлари бюджетлари киради.

Тошкент шаҳар маҳаллий бюджети тузилмасига шаҳар бюджети ва шаҳар таркибига кирувчи туманларнинг бюджетлари киради.

Давлат бюджетини тузишда унинг даромадлар ва харажатлар ёйилмалари республика бюджети, Қорақалпоғистон республика бюджети, вилоят бюджетлари, Тошкент шаҳар бюджети ҳамда уларнинг туманлар ва шаҳарлар бюджетлари даромадлар ва харажатлар ёйилмалари асосида тузилади.

Давлат бюджетининг даромадлар ва харажатлар ёйилмалари бир молия йили муддатига тузилади ва амал қилади.

Давлат бюджетининг даромадлар ва харажатлар ёйилмалари сўмда тузилади.

Давлат бюджетининг даромадлар ва харажатлар ёйилмаларини шакллантириш, тасдиқлаш ва унга ўзгартиришлар киритиш Молия вазирлиги Ахборот тизими орқали амалга оширилади.

Давлат бюджетини тузиш жараёнида Давлат бюджети тузилмасига кирадиган бюджетлар ўртасида ажратмалар нормативлари белгиланадиган солиқлар ва солиқсиз тушумлар таркиби аниқланади ҳамда уларга ажратиладиган даромадлар ажратма миқдорлари белгиланади.

Қорақалпоғистон бюджети, вилоятлар ва Тошкент шаҳар маҳаллий бюджетлари харажатларини уларнинг даромадларидан ошиб кетишига – тақчиллигига – йўл қўйилмаслик мақсадида тегишинча даромадларни тақсимлаш ва қайта тақсимлаш тизими орқали улар даромадлари ва харажатлари баланси таъминланади.

Давлат бюджетини тузиш жараёнида унинг даромадлари республика бюджети, Қорақалпоғистон бюджети, вилоят бюджетлари, Тошкент шаҳар бюджети, туманлар ва шаҳарлар бюджетлари ўртасида уларнинг бюджетларида кўзда тутилган харажатларни маблағлар билан таъминлаш мақсадида тақсимланади.

Давлат бюджети тузилмасига кирадиган бюджетлар даромадлар ва харажатлар баланси Бюджет кодекси ва ҳар йили қабул қилинадиган давлат бюджети тўғрисидаги қонунга асосан таъминланади ҳамда республика бюджети, Қорақалпоғистон бюджети, вилоят бюджетлари, Тошкент шаҳар бюджети, туманлар ва шаҳарлар бюджетлари учун даромадларнинг ажратмалар миқдорлари белгиланади.

Тартибга солувчи даромадларнинг норматив ажратмалар миқдорларини белгилаш:

Ўзбекистон республика бюджети, Қорақалпоғистон бюджети, вилоятлар ва Тошкент шаҳар маҳаллий бюджетлари ўртасида тақсимланадиган даромадлар бўйича Молия вазирлиги томонидан;

Қорақалпоғистон республика бюджети, вилоят бюджетлари, Тошкент шаҳар бюджети, шунингдек улар таркибидаги туманлар ва шаҳарлар бюджетлари ўртасида тақсимланадиган даромадлар бўйича Қорақалпоғистон Республикаси Молия вазирлиги, вилоятлар ва Тошкент шаҳар ҳокимликлари молия бош бошқармалари томонидан амалга оширилади.