Терговчилар Врбетицадаги портлашлар иши доирасида Чехия президентининг Тожикистонга ташрифи тафсилотларини ўрганмоқда – ОАВ

Тергов Врбетицадаги қурол омбори портлаши иши доирасида Чехия президенти Милош Земаннинг 2014 йил ноябрда Тожикистонга амалга оширган ташрифи тафсилотларини ўрганмоқда. Бу ҳақда "Список" нашри хабар берди.

 Ташриф давомида Чехия давлат раҳбари делегацияси таркибида Imex тижорат компанияси эгаси Петер Бернатик-тўнғич ҳам бўлганлиги терговчиларда алоҳида қизиқиш уйғотган. Унинг компанияси Врбетицадаги омборларни қурол-яроғлар сақланиши учун ижарага олган.

 Нашрнинг ёзишича, Тожикистонда Бернатик-тўнғич 2014 йилнинг 23 ва 27 ноябр кунлари Тожикистон чегара хизмати генерали Ражабали Раҳмонали билан учрашган. Терговчилар ушбу учрашувлар Врбетицадаги воқеаларга бевосита алоқадор бўлиши мумкин, деб ҳисобламоқда.

 Маълумот берилишича, Бернатик-тўнғич 2014 йил сентябрда – Врбетицадаги биринчи портлашдан сал аввал генерал Раҳмоналидан электрон почта орқали омбор ҳудудига икки инспекторни киритиш тўғрисида мактуб олган. Нашрнинг ёзишича, бу инспекторлар "Россия махсус хизмати агентлари" бўлган.

 Бернатик-тўнғич генерал билан анчадан буён танишлигини, Тожикистон билан эса Чехиядан қурол экспорт қилиш борасида иш олиб борганини тан олган. 

 17 апрелда Чехия бош вазири Андрей Бабиш мамлакат махсус хизматларидан Врбетицедаги ҳодисага Россия бош разведка бошқармаси ходимлари алоқадорлиги ҳақида ахборот олганини маълум қилди. Бу айбловлар Чехия ва Россия ўртасидаги муносабатлар таранглашишига олиб келди.

Врбетицадаги портлашлар 2014 йил 16 октябрда ва 3 декабрда юз берган. Портлашлар оқибатида 2та омбор йўқ бўлган, 2 киши ҳалок бўлган.

Бир ярим ойдан кейин биринчи омбордан бир километр узоқликда жойлашган бошқа омборда кучли портлаш содир бўлган. Бу ерда 100 тоннага яқин ўқ-дори сақланган.