Дам олиш кунлари Европа миллий чемпионатларида ҳал қилувчи палла бўлади, деб бемалол айтиш мумкин. Испанияда чемпионликка даъвогар тўрт жамоа ўзаро ўйинларда майдонга тушса, Англияда ЕЧЛ финалига чиққан клублар тўқнашуви, бошқа лигаларда ЕЧЛ йўлланмалари учун кураш авж олган. Соврин юта олмаслиги билан «ном қозонган» Маурисио Почеттино эса бу «ишни» Францияда ҳам давом эттириши мумкин. «Лилль» мавсум тугашига 2 тур қолганда пешқадам ва жуда ишончли кўринмоқда.
Ла Лига. 35-тур
8 май (шанба)
БАРСЕЛОНА – АТЛЕТИКО
Ўйин бошланиш вақти: 19:15
ТВ-трансляция: FutbolTV
Бугун Испанияда нафақат турнинг, балки йилнинг марказий учрашуви бўлиб ўтади. 7 йил аввал «Камп Ноу»да худди шу жамоалар ўртасида чемпионлик ўйини бўлиб ўтган ва 1:1 ҳисобидаги дуранг мадридликларни мамлакат чемпионига айлантирганди. Бу сафарги интрига янаям каттароқ, зеро дуранг «Барселона»ни ҳам, «Атлетико»ни ҳам қониқтирмайди. У ҳолда «Реал» биринчи ўринга чиқиб олиши ва уч тур қолганда ушбу пойганинг фаворитига айланиши мумкин.
«Барселона» «Гранада»дан учралган аламли мағлубиятдан сўнг, учликдаги фаворит мақомини бой берди. Энди Куман шогирдлари бугун «Атлетико»ни ютишлари шарт ва «Реал»нинг қоқилишидан умид қилишларига тўғри келади. «Атлетико»нинг имконияти эса ўз қўлида – қолган 4 ўйинда ғалаба қозон ва сен чемпионсан.
Ўйинга ҳар икки жамоа ҳам оптимал таркибларда етиб келаётгани ҳам айни муддао, учрашувнинг шиддатли ва сифатли бўлишини таъминлайди. Фақатгина меҳмонлар сафида қанот литерали Ренан Лодининг жароҳати Симеоне имкониятларини чеклаши мумкин. Одатда, у топ рақибларга қарши уч марказий ҳимоячи билан ўйнайди ва бу схемада Трипьер ва Лоди икки қанотда тўп сурадилар. «Эльче»га қарши ўйинда «Атлетико» 4-4-2 ўйнади, Карраско ва Лемар вингер позицияси учун танланди. Хўш, Симеоне ўз анъанасидан воз кечиб, кучли рақибга нисбатан ҳам 4-4-2 да ўйнайдими ёки литерал сифатида Лодининг ўрнига Карраско ёки Лемардан фойдаланадими? Ҳар икки ҳолат ҳам Симеоне учун оптимал вариант эмас ва айнан шу муаммо балки мадридликлар учун ҳал қилувчи бўлиши мумкин.
Ўзаро ўйинларга келсак, биринчи даврада Мадридда бўлиб ўтган баҳсда мезбонлар минимал ҳисобда ғалаба қозонгандилар. Умуман сўнгги уч ўйиндан бери каталонияликлар «Атлетико»ни енга олмаяптилар. «Камп Ноу»даги сўнгги учрашув ўтган йилнинг июлида бўлиб ўтган ва 2:2 ҳисоби қайд этилганди.
Мавзуга оид
АПЛ. 35-тур
8 май (шанба)
МАНЧЕСТЕР СИТИ – ЧЕЛСИ
Ўйин бошланиш вақти: 21:30
ТВ-трансляция: FutbolTV
Футбол мухлислари Чемпионлар Лигаси 2020/21 финали репетициясини бугуноқ томоша қилишлари мумкин. Албатта, бу шунчаки машғулот эмас, ҳар икки жамоа учун АПЛда катта вазифалар бор. «Манчестер Сити» бугун ғалаба қозонса, муддатидан аввал расман Англия чемпионига айланади. Гвардиола бу ишни кечиктирмоқчи эмаслигини таъкидлади, жамоа учун энг муҳим турнир барибир АПЛ бўлиб қолишини алоҳида эътироф этди. «Челси» учун ҳам очко сув ва ҳаводек зарур. Лондонликлар ЕЧЛ йўлланмасини берувчи топ-4лик учун курашмоқдалар. «Лестер»нинг кечаги мағлубияти Тухель шогирдларига 3-ўринга чиқиб олиш имкониятини яратди.
«Челси» учун яна бир аҳамиятли жиҳат шундаки, жамоа келаётган 10 кун ичида «Манчестер Сити», «Арсенал» ва «Лестер» билан чемпионат ўйинида, шунингдек, «Лестер» билан Англия кубоги финалида майдонга тушиши керак. Бундай тиғиз тақвимнинг бошидаёқ мағлубият «Челси»нинг турнир жадвалидаги устунлигини йўққа чиқаради, «Вест Ҳэм» ва «Ливерпуль»нинг ортдан қувиб келаётгани қўшимча босим юклайди. Тухелнинг Гвардиола устидан кубок яримфиналида ғалаба қозона олгани лондонликларга умид бериши шубҳасиз. Биринчи даврадаги ўйинда эса «Манчестер Сити» сафарда 3:1 ҳисобида ишончли ғалабага эришганди.
Бу икки жамоа АПЛда захира ўриндиғи энг бой, ротация ва турли формациялар учун энг қулай таркибга эга эканликларини ҳам айтиб ўтиш керак. Пепда ҳам, Томасда ҳам, айниқса яримҳимоя ва ҳужумда, қанотларда танловлар шу қадар кўпки, бошланғич таркибни тахмин қилиш имконсиз. Фақатгина «Манчестер Сити» марказий ҳимоясида бу сафар қайси жуфтлик тўп суришини биламиз, холос. Жон Стоунз «Астон Вилла»га қарши ўйинда ҳакам томонидан майдондан четлатилган ва ушбу ўйинда шерикларига ёрдам бера олмайди. Меҳмонлар сафида Матео Ковачичдан бошқа барча футболчилар учрашувга тайёр. Бу баҳс билан ЕЧЛ финали ҳақида тасаввур пайдо қилишингиз мумкин.
Бундеслига. 32-тур
8 май (шанба)
БОРУССИЯ Д – ЛЕЙПЦИГ
Ўйин бошланиш вақти: 18:30
ТВ-трансляция: SportTV
Бу тўқнашув Бундеслига топ-4га ҳам тепадан, ҳам пастдан таъсир қилади. Ҳозирда «Бавария»дан 7 очко ортда бораётган «Лейпциг» очко йўқотадиган бўлса, мюнхенликларни муддатидан олдин мамлакат чемпионига айлантиради. Бу «Бавария»нинг қаторасига 8-чемпионлиги бўлади. Мезбонларнинг мағлубияти эса жамоани топ-4дан узоқлаштириб қўяди. Ҳозирда дортмундликлар «Вольфсбург»дан 2, «Айнтрахт»дан 1 очко кам жамғариб, 5-ўринда боришмоқда. «Айнтрахт» ўзи шундоғам осон тақвимга эга – франкфуртликлар ўртамиёна «Майнц» ва «Фрайбург», аллақачон лигани тарк этган «Шальке» билан ўйнайдилар. «Боруссия» қолган уч ўйинини ўз фойдасига ҳал қилиши ва «Айнтрахт»нинг қоқилишидан умид қилиши керак. «Лейпциг» билан ўйинда очко йўқотилиши эса имкониятни янада пасайтириб юборади. Дарвоқе, «Вольфсбург»нинг ҳам ҳали «Лейпциг» билан ўйини бор.
«Боруссия»нинг ЕЧЛ йўлланмасига бу қадар урғу бераётганимизнинг сабаби шундаки, бу ҳолат нафақат Германия, балки Европа футболидаги мувозанатга ҳам таъсир кўрсатиши мумкин. Маълумки, Дортмундда Санчо ва Ҳоланд исмли икки «жавоҳир» бор. Клуб эгалари имкон қадар бу футболчиларни сақлаб қолишни, ҳеч бўлмаганда улардан бирининг Дортмундда қолишидан умид қилмоқдалар. Катта эҳтимол билан Манчестерга кетишга ўтган ёздаям яқин бўлган Санчони сотиб, англиялик вингердан фарқли равишда таркибда ўринбосари бўлмаган Ҳоландни яна бир йилга олиб қолмоқчилар. Чемпионлар лигаси йўлланмасисиз, Европанинг деярли барча грандлари харидор бўлаётган ҳужумчини олиб қолиш янада қийинлашиб кетади. Демак, «Боруссия»нинг ЕЧЛдан четда қолиши ёзда трансферлар бозорини янада қизитиб юбориши шубҳасиз.
Мезбонлар таркибида йўқотишлар кўпроқ. Жароҳатланган Витцел, Загаду, Шмельцерлар сафига Вольфсбургдаги ўтган тур ўйинида майдондан четлатилган Жуд Беллинҳэм ҳам қўшилди. «Лейпциг» сафида эса Нкункунинг ўрни билиниши мумкин. Футболчи катта эҳтимол билан мавсум охиригача майдонга қайта олмайди.
Қизиғи, айни шу рақиблар орадан 4 кун ўтиб, 13 май куни Германия кубоги финалида ҳам куч синашадилар.
А Серия. 35-тур
9 май (якшанба)
ЮВЕНТУС – МИЛАН
Ўйин бошланиш вақти: 23:45
ТВ-трансляция: FutbolTV/UzReportTV
Ҳар икки жамоага қайсидир маънода ачиниш мумкин. «Ювентус» 9 йиллик қаторасига чемпионликдан кейин охирги турларда ЕЧЛ йўлланмаси учун курашиши кутилмаган ҳолат. «Милан»га келсак, жамоанинг ҳозирги эгаллаб турган ўрни сўнгги йиллар учун жуда яхши натижа бўлса-да, Пиоли шогирдлари яқин яқингача турнир жадвалини бошқариб келишганди.
Хуллас, ҳозир А Серияда «Интер»нинг ортидан уч жамоа бир хил – 69 очко билан кучли тўртликка жойлашишган. Ҳаммаси тинч эди, агар ортдан яқинлашиб келаётган 67 очколи «Наполи» йўлланмалардан бирига чанг солмаётган бўлганида. «Наполи»нинг имкониятларини юқорироқ баҳолаш мумкин, чунки жамоа қолган турларни «Специя», «Удинезе», «Фиорентина» ва «Верона»га қарши ўтказади. Неаполликлар бу ўйинларда ғалаба қозониб, юқоридан кимдир қоқилишини кутиши мумкин. Кимдир қоқилиши ҳам шубҳасиз – «Ювентус» ва «Милан»нинг ўзаро ўйинидан ташқари, ҳали бизни «Аталанта» ва «Милан» ўртасидаги ўйин ҳам кутиб турибди. Демак, ҳали Италияда ҳеч нарса аниқ эмас, «Интер»дан бошқа исталган жамоа ЕЧЛ йўлланмасидан қуруқ қолиши мумкин.
Мезбонлар таркибида фақат Вулқон Демирал майдонга туша олмайди. У 10 мартдаги жароҳатидан ҳали тиклангани йўқ. «Милан» сафида эса Кастильехо дисквалификация қилинган. У «Беневенто»га қарши ўйинда ҳакам томонидан огоҳлантирилган ва бу унинг мавсумдаги 5-сариқ карточкасидир.
Ла Лига. 35-тур
9 май (якшанба)
РЕАЛ – СЕВИЛЬЯ
Ўйин бошланиш вақти: 23:55
ТВ-трансляция: FutbolTV/UzReport
Италия, Англия ва Германияда Чемпионлар Лигаси йўлланмаси учун кураш қизғин паллага кирган бўлса, Испанияда тўртлик аллақачон шаклланиб улгурган. Аммо бу ерда ставкалар янада юқори, мана шу тўртликда ҳатто чемпион бўлиш учун ҳам имконият сақланиб турибди. Бошқа лигаларда эса «Интер» – чемпион, Англия ва Германияда чемпион ҳатто бугуноқ расман аниқ бўлиши кутилмоқда.
Бу тўртликда «Реал»нинг имкониятлари ёмон эмас. Қолган 4 ўйинда ғалаба қозониш ва «Атлетико»нинг қоқилишини кутиш. Зидан жамоасининг устунлиги шундаки, улар «Барселона» билан ҳам, «Атлетико» билан ҳам ўзаро ўйинларда муваффақиятли бўлишган, маълумки, Ла Лигада очколар тенг бўлганда, аввало, мана шу факторга эътибор берилади. «Камп Ноу»да «Атлетико»нинг очко йўқотиши ва «Севилья» устидан ғалаба «Реал»ни турнир жадвалида пешқадамга айлантиради.
Бу осон бўлмайди, албатта. Тўғри, «Реал» «Севилья»га қарши охирги 4 ўйинни ғалаба билан якунланган. Аммо бу ғалабалар осонлик билан келмаган. Бунинг устига, «Реал» бутун мавсумни жароҳатлар гирдобида ўтказди ва бу борада ҳам Европа рекордини ўрнатди. Қайсидир паллада, «Реал» ушбу муаммога қарши йўлини топгандир, зеро шу ергача етиб келиш ҳам осон эмас. Лекин мавсум сўнгида аксарият футболчиларнинг формада эмасликлари, доим майдонга тушган футболчилардаги чарчоқ ўз таъсирини кўрсатмай қолмаяпти. «Бетис» ва «Хетафе»га қарши ўйинлардаги очко йўқотиш, Чемпионлар Лигасидаги «Челси»га қарши нурсиз ўйинлар асосан мана шу факторлар таъсирида рўй берди. Зидан ҳал қилувчи паллаларда ротациялар ёрдамида футболчилар формасини юқори ушлаб туриш ва керакли ўйинларда бундан фойдаланиш билан ном қозонганди. Бу сафар «Реал»нинг таркиби ушбу имконни бермади.
«Реал» «Севилья»га қарши ўйинда Рамос, Варан, Васкес ва Карвахалсиз тушади. Шунингдек, Вальверденинг ҳам яхши спорт формасида эмаслигини «Челси»га қарши ўйинда кўрдик. Шунингдек, ҳафта ўртасида «Челси»га қарши қийин сафар бўлгани «Севилья»га қўшимча устунлик бериши турган гап. Деярли мавсумолди тайёргарликсиз ва танаффуссиз кечган пандемия мавсумида дам олинган ортиқча 2 куннинг баҳоси ҳам жуда катта бўлади.
