Самарқандлик ёш чавандоз Германияда ўтган халқаро мусобақада ғолиб бўлди

Ўсмирлар ўртасида Германиянинг Ҳаген шаҳрида от спортининг конкур йўналиши бўйича 9-10 июн кунлари ўтган Future Champions 2021 халқаро мусобақасида самарқандлик ҳамюртимиз Абдураҳмон Абдуллаев олтин ва кумуш медалларни қўлга киритди.

Машҳур Hof Kasselmann от спорти мажмуасида ўтган мусобақада 22 давлатдан 363 нафар ёш чавандоз иштирок этди. Мусобақанинг биринчи куни ҳамюртимиз «Дукато» лақабли отда 140 см баландликдаги тўсиқлардан ўтиш дастурида энг яхши натижани кўрсатиб, 1-ўринни қўлга киритди. Ушбу спортчимиз иккинчи куни «Гофорит» лақабли тулпорда кумуш медалга сазовор бўлди.