30 июнь куни бир қатор таниқли футболчиларнинг шартномалари муддати якунланди. Қуйида айни вақтда расман ишсиз бўлган ўн футболчи ҳақида.
Жанлуижи Доннарумма
Ёши: 22
Амплуа: дарвозабон
Трансфер қиймати: 60 миллион евро*
Сўнгги клуби: «Милан»
Эҳтимолий маршрут: «ПСЖ»
* transfermarkt.com.
Италия термаси дарвозабони мавсум якунида «Милан» билан хайрлашганди ва энди «ПСЖ»га ўтиши кутилмоқда. Барча нарсани билувчи инсайдер Фабрицио Романо бир неча марта шартнома тафсилотларини очиқлади — тузилажак шартнома 2026 йилга қадар амал қилади, дарвозабон ҳатто тиббий кўрикдан ўтиб бўлган. Аммо келишув ҳақида ҳали ҳам расман эълон қилинмади, бу эса Доннарумма ҳамон эркин агентлигини англатади.
Серхио Рамос
Ёши: 35
Амплуа: ҳимоячи
Трансфер қиймати: 10 миллион евро
Сўнгги клуби: «Реал»
Эҳтимолий маршрут: «ПСЖ», «Ювентус»
Испан футболидаги энг обрўли ҳимоячи бўлган Рамос Мадрид суперклубига 16 йилини бағишлади, аммо барибир клубдан кетишига тўғри келди. Сўнгги мавсумда «Реал» сардори жароҳатлардан жабр чекди ва клуби билан шартнома шартлари бўйича келиша олмади. Энди Рамос эркин агент, аммо унда таклифлар бор. Ҳозирча энг эҳтимолий вариант — «ПСЖ».
Алсаид Ҳюсай
Ёши: 27
Амплуа: ҳимоячи
Трансфер қиймати: 13 миллион евро
Сўнгги клуби: «Наполи»
Эҳтимолий маршрут: «Лацио»
Ушбу албаниялик ҳимоячига қишда Москванинг «Спартак» клуби қизиқаётганди, баҳордаёқ Ҳюсайнинг ўзи мавсум якунида «Наполи»дан кетишини эълон қилганди. У Москвага йўл олиши эҳтимолдан йироқ — қизил-оқлар жамоасида ўнг қанот ҳимоясига футболчилар етарли. Катта эҳтимол билан, Ҳюсай Маурицио Сарри бошчилигида янги мавсумни бошлайдиган «Лацио»га ўтади.
Никола Максимович
Ёши: 29
Амплуа: ҳимоячи
Трансфер қиймати: 10 миллион евро
Сўнгги клуби: «Наполи»
Эҳтимолий маршрут: «Рома»
Сербиялик ҳимоячи сўнгги мавсумда «Наполи»нинг асосий таркибидан тушиб қолди ва шартномаси тугаши билан клубни тарк этди. Италиядаги нашрлар унинг кейинги манзили Жозе Моуриньо «Рома»си бўлиши ҳақида ёзишмоқда.
Давид Луиз
Ёши: 34
Амплуа: ҳимоячи
Трансфер қиймати: 4 миллион евро
Сўнгги клуб: «Арсенал»
Эҳтимолий маршрут: «Марсель»
Бразилиялик бу футболчи анча вақтдан буён аввалгидек ўйнай олмаяпти ва «Арсенал»нинг кўплаб мухлислари Давид Луиз клубни тарк этиши ҳақидаги хабарни хурсандчилик билан кутиб олишганди. Лондонликлар ундан ташқари дарвозабон Мэтью Райан, ҳавбеклар Мартин Эдегор ва Дани Себальос билан келишув муддати тугагани ва улар билан хайрлашилганини эълон қилган. ОАВда тарқалган миш-мишларга кўра, Луиз «Марсель» билан келишиб бўлган ва тез орада Хорхе Сампаоли жамоасига келиб қўшилади.
Жером Боатенг
Ёши: 32
Амплуа: ҳимоячи
Трансфер қиймати: 8,5 миллион евро
Сўнгги клуби: «Бавария»
Эҳтимолий маршрут: «Монако», «Ҳерта», «Лацио», «Рома»
Май ойи охирида «Бавария» мухлислари сўнгги йиллардаги улкан ғалабалар ижодкорларининг бир қанчаси билан хайрлашишди. Ҳанс-Дитер Флик Германия термасида иш бошламоқда, Хави Мартинес Қатарга йўл олди, Дуглас Коста «Гремио»га қайтди, Давид Алаба «Реал»га ўтди, Жером Боатенг эса ҳозирча ўзига янги иш жойи топгани йўқ. Келиб чиқишига кўра Ганага мансуб бўлган германиялик ҳимоячи «Бавария»га 10 йилини бағишлади, жамоа билан барча турнирларда камида бир мартадан ғолиб бўлган, аммо энди унинг фаолиятида пасайиш бошланди.
Hansi Flick, Jerome Boateng, Miroslav Klose ,all say goodbye to Bayern Munich pic.twitter.com/e8zAb4mIy8
— The Empire_ (@TheEmpires_blog) May 22, 2021
Патрик ван Анҳолт
Ёши: 30
Амплуа: ҳимоячи
Трансфер қиймати: 7 миллион евро
Сўнгги клуб: «Кристал Пэлас»
Эҳтимолий маршрут: «Арсенал», «Интер»
Нидерландия термаси ҳимоячиси Евро-2020да ёмон ўйнамади, шундай экан, катта клублар яқин орада унга таклиф билан чиқиб қолса ажаб эмас. Ван Анҳолт шу вақтга қадар «Кристал Пэлас» даражасидаги ўртамиёна клубларда қанотда ҳукмронлик қилиб келган, аммо у катта клубларда ҳам ўйинини йўқотиб қўймаслиги тайин.
Франк Рибери
Ёши: 38 ёш
Амплуа: яримҳимоячи
Трансфер қиймати: 3 миллион евро
Сўнгги клуби: «Фиорентина»
Эҳтимолий маршрут: Бундеслига клублари
38 ёшли француз футболчисининг Италия клуби билан амалдаги шартномаси якунига етди. Флоренцияликлар Франк билан келишувни узайтиришмади. Ҳозирда футболчи эркин агент сифатида жамоасиз қолган. Март ойида Рибери Германия чемпионатига қайтмоқчи экани ва унга Бундеслига клубларидан таклифлар борлиги ҳақида хабар берилганди.
Лионель Месси
Ёши: 34
Амплуа: ҳужумчи
Трансфер қиймати: 80 миллион евро
Сўнгги клуби: «Барселона»
Эҳтимолий маршрут: «Барселона»
Мессининг шартномаси билан боғлиқ эпопея бир неча йилдан буён давом этади. Ўтган йил ёзида аргентиналик «Барселона»дан кетишига бир бахя қолди, аммо уни барибир қолишга кўндиришди - клуб раҳбарияти ўзгариши унинг қолишида муҳим омил бўлди. Аммо футболчи ва клуб ҳамон янги шартнома имзолашмади, шундай экан 1 июль куни Месси 2000 йилдан буён илк марта «Барселона» билан шартномасиз ҳолда қолди. Шу билан бирга, кўк-анорранглилар президенти Жоан Лапорта томонлар ҳамкорликни давом эттиришни истаётгани ва тез орада муросага келинишини айтган.
Стеван Йоветич
Ёши: 31 ёш
Амплуа: ҳужумчи
Трансфер қиймати: 5 миллион евро
Сўнгги клуби: «Монако»
Эҳтимолий маршрут: «Лацио»
Черногориялик форвард монегаскликлар клубида тўрт йил ўйнади, аммо 2019 йил апрелида оғир жароҳат олгач, захира футболчисига айланиб қолди. Йоветич энди клубда қолмайди — «Монако» форвардга янги шартнома таклиф қилмади ва у энди А Серияга қайтиши кутилмоқда.
