Kun.uz мухбири айни шу масалалар юзасидан хорижий давлатларда ўқиб, ишлаш жараёнида тажриба орттирган ва бугунги кунда Ўзбекистондаги нуфузли лавозим эгалари – Абдулла Азизов ва Улуғбек Қосимхўжаев билан интервью уюштирганди.
Интервью аввалроқ эълон қилиниб, илк қисми матнлаштирилган ҳолда тақдим этилган эди. Қуйида суҳбатнинг иккинчи қисми матни жузъий қисқартиришлар билан эълон қилинмоқда.
— Ўзбекистонда ёшлар ташкилотлари мустақилликнинг илк йилларидан бошлаб, то ҳозиргача давлатнинг қаттиқ назоратида фаолият юритади. Ривожланган давлатларда эса бу масалалар билан нодавлат нотижорат ташкилотлар ишлайди. Фикрингиз қандай, нега бизда давлат бу ричагни қўлида жуда қаттиқ ушлаб олган?
Абдулла Азизов
— Хўш, тарихга назар солсак, қайси давр ва қандай давлатларда ННТ ривожланган? Жавоб шундайки, ривожланган давлатларда.
Инсоннинг моддий имкониятлари қачон ривожланар экан, у жамиятга ҳисса қўшиш, уни ривожлантириш ҳақида ўйлай бошлайди. Сизда қўшимча пул йўқ, муаммоларингиз эса кўп экан, жамият ривожи ҳақида ўйлолмайсиз.
Шунинг учун ҳам ривожланган давлатларда ННТлар жуда кўп. Ўйлашимча, биз ҳам секин-аста шу даражага етиб келяпмиз.
Баъзи танишларим ўзаро суҳбатларда нодавлат ташкилотлар очиш, бу орқали халққа нимадир яхшилик қилиш ҳақида таклиф беришади. Улар бунинг учун ўз пулини тикишга тайёр.
Бизда жамият учун ғоялар бераётган, ННТ очаётганларга эътибор берсангиз, уларнинг ўзига тўқ, дунё кўрган кишилар эканини кўрасиз.
Тан олиш керак, бизда кўп йиллар бундай эмасди. Ҳамма нарса ҳақида фақат юқоридан топшириқ тушарди.
Ўйлашимча, шу каби ННТлар ҳозирдан кўра яна 15-20 йилдан кейин жамиятга ўз самарасини кўпроқ беради. Чунки баъзи ННТлар кўп нарсани ҳамон яхши тушунмасдан, шунчаки Европадан қолип олиб қилмоқда.
