Давлат хавфсизлик хизмати Тошкент шаҳри, Тошкент ва Сирдарё вилоятларида фирибгарлик ҳолатларига чек қўйди.
Қурилиш фаолияти билан шуғулланувчи МЧЖнинг раҳбари ва юрисконсульти 4 нафар жиноий шериклари билан келишган ҳолда, бошқа бир қурилиш фирмаси бошлиғига Мудофаа вазирлигининг Тошкент шаҳрида жойлашган ҳарбий қисмларидан бирида режалаштирилган 65 млрд. сўмлик капитал таъмирлаш ишларини олиб бериш эвазига, шартнома қийматининг 4 фоизи (2,5 млрд сўм) миқдорида пул беришини талаб қилишади ва олдиндан 30 минг АҚШ доллари сўрашади.
ДХХнинг Тошкент вилояти бўйича бошқармаси, вилоят прокуратураси ва иқтисодий жиноятларга қарши курашиш департаментининг ҳудудий бошқармаси ходимлари томонидан ўтказилган тезкор тадбирда улар сўралган пулни олган вақтида ашёвий далиллар билан ушланган.
Дастлабки суриштирув ҳаракатлари давомида мазкур шахслар Мудофаа вазирлигининг умумий қиймати 110 млрд сўмни ташкил этувчи бошқа қурилиш объектларини Сурхондарё вилоятидан бўлган икки мижозга олиб беришни режалаштирганликлари ҳам маълум бўлган.
Тошкент вилоятида кузатилган яна бир шунга ўхшаш ҳолатда эса 1973 йил Фарғона вилоятида туғилган шахс ва 1978 йил Қашқадарё вилоятида туғилган фуқаро Чиноз туманидаги хусусий уй-жой мулкдорлари ширкатларидан бирининг раҳбари бўлиб ишловчи 1975 йилда туғилган аёл ҳамда муқаддам хусусий уй-жой мулкдорлари ширкатлари тизимида фаолият юритган 1972 йилда туғилган аёл билан келишган ҳолда, қурилиш фирмаси вакилига ушбу ҳудуддаги кўп қаватли уйларда умумий қиймати 5 млрд сўмлик қурилиш-монтаж ишларини олиб бериш эвазига ундан 25 минг АҚШ доллари талаб қилишади.
Ўтказилган тезкор тадбирда улар аванс сифатида 10 минг доллар олган вақтларида ушланди.
Тошкент вилоятида яшовчи, муқаддам ички ишлар идораларида ишлаган шахс жиноий шериги билан келишган ҳолда ички ишлар органларидаги мансабдор танишлари орқали Тошкент шаҳрида яшовчи фуқарони ИИВ Академияси қошидаги сержантлар тайёрлаш мактабига ўқишга киритиб қўйиш эвазига 13 минг АҚШ доллари талаб қилади.
ДХХнинг Тошкент шаҳар бошқармаси ходимлари томонидан Бош прокуратура ҳузуридаги департаментнинг шаҳар бошқармаси ходимлари билан ҳамкорликда ўтказган тезкор тадбирида фирибгарлар сўралган пулдан 6 минг АҚШ долларини олган вақтларида ушланди.
