Беларусда собиқ сиёсий маҳбус сифатида танилган журналист Анджей Почобут 8 сентябр куни Полша–Беларус чегарасидаги Бобровники назорат-ўтказиш пункти орқали Беларусга кириб келди.
Почобутнинг ўзи ҳам X ижтимоий тармоғида Гродно шаҳридан сурат эълон қилиб, унга поляк тилида «Неман бўйида» деган изоҳ қолдирган.
Польшанинг PAP ахборот агентлиги махсус хизматлар маълумотига таяниб, журналист чегарадан бир аёл ҳамроҳлигида ўтганини хабар қилди. Gazeta Wyborcza нашри маълумотига кўра, Почобут 8 сентябр куни эрталаб Полша–Беларус чегарасини кесиб ўтган.
Журналистнинг Беларусда етти кун қолиши режалаштирилган. Бу вақт давомида у оила аъзолари ҳамда Беларусдаги поляклар иттифоқидаги ҳамкасблари билан учрашмоқчи. Gazeta Wyborcza журналисти Бартош Велинский сафарни «мутлақо шахсий» деб атаган. Маълум қилинишича, Беларусдан сўнг Почобут АҚШга йўл олишни режалаштирмоқда.
Почобут қарийб беш йил қамоқда бўлган
Беларус раҳбари Александр Лукашенконинг танқидчиси бўлган Анджей Почобут 2021 йил июнидан бошлаб қамоқда сақланган. 2023 йилда Беларус суди уни саккиз йилга қаттиқ режимли колонияга ҳукм қилган.
2025 йил октябрида Европа парламенти Почобутга Андрей Сахаров номидаги «Фикр эркинлиги учун» мукофотини берган.
2026 йил 28 апрелда эса Почобут Беларус, Россия ва Европа Иттифоқи ўртасидаги маҳбуслар алмашинуви натижасида озод қилинган. Озодликка чиққанидан кейин у Полшадаги Белосток шаҳрида яшаб келаётган эди.
Қизиғи, Почобут Беларусга қайтишда фойдаланган Бобровники чегара пункти Полша томонидан айнан унга ҳукм чиқарилганидан кейин ёпилган эди. Кейинчалик унинг фаолияти қайта тикланган.
Почобут озод этилганидан кейин кузда Беларусга бориш нияти борлигини айтган. Дастлаб у Беларусдаги поляклар иттифоқи съездида иштирок этишни режалаштирган, бироқ мазкур тадбир 2027 йил баҳорига кўчирилган.
