Сурхондарё вилояти Музработ туманида одамларнинг пулларини ўзлаштирган «машинафуруш»га жиноий иш қўзғатилган. Бу ҳақда вилоят ИИБ хабар бермоқда.
Маълум қилинишича, 2021 йил 8 июнь куни Музработ туманининг Буюк ипак йўли маҳалласида яшовчи, Х.Шерали туман ИИБга ариза билан мурожаат қилган. У ўз мурожаатида жорий йил 12 январь куни туманнинг Дарбанд маҳалласида яшовчи, Б.Сафар унга «Нексия» машинасини 60 миллион сўмга сотиб, шундан 30 миллион сўм пулларини олиб, машинани расмийлаштириб бермасдан келаётганини маълум қилган.
Бундан ташқари, Б.Сафар 2020 йил 11 февраль куни Музработ туманининг Орият маҳалласи ҳудудида, ўзига тегишли «Нексия» машинасини Жарқўрғон тумани, Оби ҳаёт маҳалласида яшовчи Й.Азизга 49,5 миллион сўмга сотиб, ундан 15 миллион сўм олган. Сўнг ушбу машинани бошқа харидорга сотиб юбориб, Й.Азизга 15 миллион сўм пулларини бермай юргани аниқланган.
Қайд этилишича, жорий йил 7 июль куни Б.Сафарга нисбатан Жиноят кодексининг 168-моддаси 3-қисми «б» банди билан жиноят иши қўзғатилган.
