Покистон Афғонистон билан чегарага ҳарбийларини жўнатди

Покистон ҳарбийлар ва жангарилар ўтишини тўхтатиш учун Афғонистон билан чегарага армия жўнатди. Бу ҳақда мамлакат ички ишлар вазири Шайх Рашид Аҳмадга таяниб Dawn газетаси хабар берди.

"Эндиликда чегарани мунтазам қўшинлар назорат қилади", - дея Аҳмаднинг сўзларидан иқтибос келтиради газета.

Қайд этилишича, ҳарбийлар ноқонуний миграцияга қарши курашувчи чегара полициясининг ўрнини эгаллайди.

Ички ишлар вазирининг сўзларига кўра, қўшни давлатдаги беқарор вазият сабабли Покистон нафақат қочқинлар, балки жангарилар ва ҳарбийлар чегарани кесиб ўтишининг олдини олишига тўғри келади.

Аҳмаднинг қўшимча қилишича, Афғонистондаги низо мамлакатнинг ички иши ҳисобланади ва Исломобод ҳеч бир томоннинг тарафида бўлмайди.

Аввалроқ Шайх Рашид Аҳмад Покистон афғонистонлик қочқинларга ўз чегараларини очмасликка қарор қилгани ҳақида айтганди.