Ҳаити ҳукумати президентнинг ўлдирилишини тергов қилишда БМТдан ёрдам беришни сўради

Ҳаити ҳукумати БМТдан президент Жовенел Моизнинг ўлдирилиши бўйича халқаро тергов ўтказилишида ёрдам беришни сўради. Моиз 7 июлда ўз қароргоҳида бир гуруҳ ёлланмалар томонидан ўлдирилганди. 

Ҳаити ҳукумати бу мақсадда 3 августда БМТ бош котиби Антониу Гутерриш номига мактуб йўллаган. Ҳукумат аъзоларининг таъкидлашича, Моизнинг ўлдирилиши хорижликлар томонидан амалга оширилгани, режалаштирилгани ва молиялаштирилгани сабабли халқаро даражадаги жиноят ҳисобланади. Қотилликни тергов қилиш бўйича халқаро комиссия тузилишидан ташқари, ҳужум қилганларга жазо ҳукми чиқариш бўйича махсус суд ҳам ташкил этилиши таклиф қилинган.

Ҳозирда қотилликка алоқадорликда гумонланиб 23 киши, жумладан 18 колумбиялик ва 5 ҳаитилик қўлга олинган.

Айни вақтда Ҳаитида фавқулодда ҳолат режими амал қилмоқда.