Ўрганиш ишларидан аввал Устюрт газ қазиб чиқариш бошқармаси масъуллари томонидан Шарқий Бердақ конида ташкил этилган штабда табиий газ қазиб чиқариш ҳамда углеводородлар захираси ҳажмини ошириш борасида амалда қилинаётган ишлар, режалар борасида тақдимот ўтказилди.
Устюрт газ қазиб чиқариш бошқармасида 2021 йилнинг ўтган даври мобайнида табиий газ қазиб чиқариш режа кўрсаткичларининг бажарилиши муҳокама қилинди ҳамда ўрганиб чиқилди.
2021 йилнинг январь-июль ойлари давомида бошқармада 2,1 млрд куб метр табиий газ қазиб чиқарилишига эришилди ва режа кўрсаткичи ортиғи билан, яъни 105,8 фоизга бажарилишга эришилди. Ўтган йилнинг мос даврига нисбатан ўсиш суръати 113,1 фоизни ташкил этди.
Худди шунингдек, 32,7 минг тонна газ конденсати қазиб чиқарилди, бу борада эса режа кўрсаткичи 102 фоизга бажарилди. Газ конденсати қазиб чиқарилиши борасида, ўтган йилнинг мос даврига нисбатан ўсиш суръати 102,7 фоизни ташкил этди.
Тақдимот давомида табиий газ қазиб чиқариш режа кўрсаткичларининг бажарилишини таъминлашга қаратилган жами 48 та геологотехник тадбирлар амалга оширилгани борасида ахборот берилди.
Шундан 24 та янги газ қудуқлари бурғилашдан ишга туширилиб, 20 та мавжуд газ қудуқларида капитал таъмирлаш ва интенсификация ишлари олиб борилди, технология йўналишида эса 4 та тадбирлар амалга оширилгани бўйича ҳам ҳисоботлар тингланди.
Таъкидлаш керакки, ижобий натижаларга эришиш учун узунлиги 14,4 км бўлган 3 та газ қувурлари ишга туширилди ва битта технологик объектда реконструкция ишлари ҳам амалга оширилди, ушбу тадбирларни амалга ошириш ҳисобидан жами 451,5 млн куб метр газ қазиб чиқаришга эришилди.
Белгиланган кўрсаткичларнинг ортиғи билан бажарилишида, “Ўзбекнефтгаз” АЖ ички имкониятларидан ҳам кенг фойдаланилди, жумладан, янги бурғиланган қудуқларни, газ коллекторларини ишга туширишни тезлаштириш учун бошқармалар ички ресурсларидан турли ўлчамдаги жами 17,5 км қувурлар етказиб берилди.
Бошқарув раисининг ташаббуси билан газ қазиб чиқариш ҳажмини янада ошириш учун, 2021 йил якунига қадар 68 та геологотехник тадбирларни амалга ошириш режалаштирилган (16 та газ қудуқларини бурғилашдан ишга тушириш, 50 та газ қудуқларида капитал таъмирлаш ва интенсификация ишлари олиб бориш ва технология йўналишида 2 та объектни ишга тушириш). Белгиланган вазифаларнинг бажарилиши 956,4 млн куб метр табиий газ қазиб чиқаришга замин яратади.
