Жорий йилнинг 30 август куни Ўзбекистонга “Спутник V” вакцинасининг навбатдаги партияси олиб келинади. Бу ҳақда Санитария-эпидемиологик осойишталик ва жамоат саломатлиги хизмати Вакциналар ва иммунопрофилактика бўлими бошлиғи Дилором Турсунова хабар берди.
Мутахассис вакцина дозалари орасидаги муддат узайиши унинг самарадорлигига таъсир қилмаслигини айтди.
“Спутник V” вакцинасининг навбатдаги партиясини келтириш бўйича бироз кечикиш кузатилмоқда. Айтишим мумкинки, 30 август куни мамлакатимизга “Спутник V” вакцинаси келтирилади. Бундай савол билан кўплаб фуқаролар мурожаат қилмоқда. Ушбу вакцинанинг 1- ва 2-дозалари ўртасида 21 кун оралиғи белгиланган. Эндиликда, 1- ва 2-дозалари ўртасидаги оралиқ узоқ муддатга чўзилгани сабабли вакцинанинг амал қилиш муддати тугади ёки бошқатдан олиш керак, деган гаплар аҳоли орасида кўпайди.
Вакцина билан эмланиш оралиғи камида 21 кун деб белгиланган бўлса, 12 ҳафтагача узайтирилиши ҳам зиён келтирмайди. Вакцина олиб келинганидан сўнг, 1-компонент билан эмланган барча фуқароларга 2-компоненти ҳам қилинади”, деган СЭС бўлим бошлиғи.
Kun.uz мухбирининг аниқлашича, вакцинанинг навбатдаги партияси қанча дозада келтирилиши аниқ эмас.
Август ойининг бошида Ўзбекистонда “Спутник V” вакцинасининг иккинчи компоненти қолмаган, бу ҳолат ушбу вакцинанинг биринчи компоненти билан эмланганларда қатор савол ва хавотирларни пайдо қилган эди.
