«Бунақаси Афғонистонда ҳам йўқ» — Иқтисодчи Зафаробод-Фориш йўли мисолида соҳада қилиниши керак бўлган ишларни санади

Иқтисодчи Отабек Бакиров ўз телеграм каналида  меъёрдан ортиқ юк билан ҳаракатланаётган юк машиналари автомобил йўлларининг сифатига жиддий зиён етказаётганига тўхталиб ўтди.

«Байрам кунлари Жиззах вилоятининг Зафаробод туманидан Фориш туманига қараб енгил автомашинада ҳаракатланишга тўғри келди.

Албатта, сизга лоф туюлиши мумкин, лекин Зафарободни Фориш билан боғлайдиган йўл 40 йилдан буён уруш кетаётган Афғонистонда ҳам йўқ. Сурияда ҳам йўқ. Ишонинг.

Бу йўлдан вилоят ҳокими Эргаш Солиев юрмагани аниқ. Зафаробод туман ҳокимининг йўли тушмагандир. Ташрифлар доирасида бу жойлардан айланиб ўтадиган маршрут тузишади. Чунки мабодо давлат раҳбари бу йўлга кортежни буриб юборса, жуда кўпчилик чиновникларининг калласи ҳам, салласи ҳам кетиб қолиши турган гап.

Нега Зафаробод—Фориш йўли бунчалар абгор дейсизми? Бунга асосан Жиззах цемент заводидан цемент ташийдиган юк автотранспортлари сабабчи. Таснифи бўйича 10 тоннали юкдан ортиғи йўлни бузиши аниқ бўлатуриб бу йўлдан 40, 50, 60 тонна юк ортган автотранспортлар қатнайди. Табиийки, асфальт ва тош қопламаси 30, 50 см ва ҳатто 1 метргача чўкиб кетган. Бутун йўл вертикал ва горизонтал гармошкага айланган.

Лекин йўлда юк меъёри бўйича на огоҳлантиришлар ва на махсус тарозилар бор», дейди иқтисодчи.

У  тарози билан таъминланган ва меъёрдан ортиқча юк юклаган автотранспортлардан қўшимча тўлов ундириладиган йўллар саноқли эканини қайд этиб, бир тарафдан йўл қуравериш ва бир муддат ўтиб яроқсиз йўлларга келиб қолмаслик учун қилиниши зарур бўлган учта ишни санади:

Биринчиси, йўлларда (аввало янги таъмирланган йўлларда) ҳаракатдаги автотранспортларнинг юк меъёри чекланганлигини кўрсатувчи йўл белгиларини ўрнатиш;

Иккинчиси, йўлларда махсус юк тарозиларини ўрнатиш ва улар фаолиятини инсон омилини минималлаштирган ҳолда йўлга қўйиш.

Учинчиси эса меъёрдан ортиқ юк билан ҳаракатланаётган юк автотранспортлари учун жарима чораларини (агар йўқ бўлса) қатъийлаштириш.