Қайд этилишича, докторантурага кириш имтиҳонлари ва суҳбат жараёнларини видеокузатув остида (онлайн трансляция) ўтказиш чоралари кўрилади.
Таянч докторантурага кириш имтиҳонлари бўйича топшириладиган биринчи фан (мутахассислик ёки чет тили) умумий баллининг 50 фоизидан кам балл тўплаган талабгорлар кейинги босқичга ўтказилмайди.
Шунингдек, маълум қилинишича, таянч докторантурага кириш имтиҳонларидаги саволлар бир ихтисосликдан бошқа ихтисосликка тўғри келмагани сабабли кўчириш мумкин эмас.
Билдирилишича, норматив-ҳуқуқий ҳужжатларда мустақил изланувчиликка расмийлаштирилган шахс таянч докторантурага ҳужжат топшириши мумкинлиги ва мумкин эмаслиги тўғрисида нормалар берилмаган. Шу муносабат билан, ҳужжат топширишда мустақил изланувчиликка расмийлаштирилган илмий ёки таълим ташкилотларининг рухсатига асосан топшириш мақсадга мувофиқ.
Стажёр-тадқиқотчилик эса ишлаб чиқаришдан ажралган ҳолда тегишли ихтисослик бўйича илмий ва илмий-ижодий изланишларни олиб бориш ва фалсафа доктори (PhD) илмий даражасини олиш учун изланувчини тайёрлаш шакли ҳисобланиб, ушбу шаклда ўқиган шахсга ҳеч қандай имтиёз берилмайди.
