Мактабгача таълим вазирлиги: 6,6 млрд сўмлик иш ҳақи ва товарлар ноқонуний ўзлаштирилган

Мактабгача таълим тизимида 6 ойда 6,6 млрд сўмлик иш ҳақи ва товарлар ноқонуний ўзлаштирилган. Бу ҳақда АОКАда Мактабгача таълим вазирлиги мутасаддилари иштирокида ўтказилган матбуот анжуманида маълум қилинди.

Фото: Kun.uz

Қайд этилишича, вазирлик ички аудит хизмати томонидан 2021 йилнинг 9 ойи давомида тизимдаги ташкилотларда жами 282та назорат тадбири ўтказилган.

Давлат хариди бўйича қонунчилик талабларига риоя қилинмасдан амалга оширилган харидлар — 10,5 млрд сўмни ташкил этган. Иш ҳақи ва унга тенглаштирилган тўловлар ҳамда товар моддий бойликларидан 6,6 млрд сўм камомад ва ноқонуний ўзлаштириш ҳолатлари аниқланган. Шундан ишламайдиган ходимлар номига ёзилган иш ҳақи — 2,4 млрд сўмни ташкил этади.

Тизимда 5,5 млрд сўмлик маблағ ва товарларнинг талон-торож бўлиши олди олинган. 9 ойда тўпланган жами 265та ҳужжат ҳуқуқни муҳофаза қилувчи органларга қонуний қарор қабул қилиш учун юборилган.