Тошкентда суғурта агентлари томонидан 662 млн сўмлик суғурта полислари талон-торож қилинган

Шайхонтоҳур туманида суғурта агентлари томонидан суғурта полислари талон-торож қилинганлиги аниқланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар бермоқда.

Қайд этилишича, маҳкама ҳузуридаги департаментнинг Шайхонтоҳур туман бўлими томонидан терговга қадар текширув ўтказилган.

Текширув давомида, якка тартибдаги тадбиркорлар К.Д. ва К.Р. “A.” МЧЖ шаклидаги суғурта компаниясининг умумий қиймати 662,1 млн сўмлик жами 5 395 дона суғурта полисларини битим асосида олгани аниқланган.

Маълум қилинишича, ушбу шахслар суғурта полисларини реализация қилишдан тушган маблағларни жамиятга ўтказмасдан ўз эҳтиёжларига сарфлаб, талон-торож қилган.  

Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят ишлари қўзғатилиб, тергов ҳаракатлари ўтказилмоқда.