Туманларда эски тартибдан чиқиб, умуман янги кўринишдаги кутубхоналар ташкил этиш мақсад қилинади, бу борадаги лойиҳа экспертизадан ўтказилмоқда. Бу ҳақда Kun.uz билан суҳбатда АОКА ахборот-кутубхона тизимини ривожлантириш бўлим бошлиғи Қобилжон Турсунов маълум қилди.
«Янгича кутубхоналар, нафақат китоб олиб ўқишга, балки ёшларнинг мулоқот майдончасига айланиши керак. Ёшлар бу ерда фақат китоб ўқибгина қолмай, ўзларини қизиқтирган нарсалар юзасидан мулоқот қилиши мумкин бўлади. Бу ерда cо-wоrking марказларининг ташкил этилиши ҳам ёшларни кўпроқ жалб этиш масаласига қаратилган. Босма нашрдан тинч китоб ўқиб ўтириш имконияти, ёки том қисмларида book-cafe’лар ташкил қилиб, бир пиёла чой устида муҳокамалар қилиш имкониятини яратиш учун шундай лойиҳа қилдик.
Лойиҳамиз охирига етай деб қолди ва уни экспертизадан ўтказяпмиз. Янги кўринишдаги кутубхоналарни туманларда қуриш масаласида таклифимизни ҳукуматга киритдик. Туманларда 2026 йилгача босқичма-босқич қуриб бориш, молиялаштириш масалаларини кўтардик. Туман кутубхоналарида ҳам Алишер Навоий кутубхонасидаги шароитларни яратишимиз керак», — дейди у.
Аввалроқ, Kun.uz ёппасига ёпилган кутубхоналар ва уларнинг ёпилиш сабаблари борасида кўрсатув эълон қилганди.
