Ёшларга бюджетдан қандай субсидия ва компенсациялар тўлаб берилади?

2021 йилнинг сентябр ойидан бошлаб Молия вазирлиги субсидия платформасини ишга туширди. Унда ҳар бир йўналиш бўйича давлат бюджетидан тўлаб бериладиган субсидиялар ҳақида маълумот олиш мумкин.

Бунинг учун subsidiya.mf.uz махсус электрон платформага кирилади.

Платформада «Субсидиялар берувчи ташкилотлар» рўйхати мавжуд. Шу рўйхатдан Ёшлар ишлари агентлигини танлаб, кимларга қандай тарзда субсидиялар берилиши борасида қонунчиликда мавжуд нормалар билан танишишингиз мумкин бўлади.

Портал маълумотлари асосида ёшларга ажратиладиган субсидия ва компенсациялар қуйидагилар:

— Ёшларни тадбиркорликка ва касб-ҳунарга ўқитиш бўйича нодавлат таълим ташкилотларига сарфланган харажатларининг 75 фоизигача қисмини (бир ой учун БҲМнинг 4 бараваригача, икки ой учун 8 бараваригача, икки ойдан ортиқ 12 бараваригача) қоплаб бериш;

— «Ёшлар дафтари»га киритилган ёшларга уруғлик ва кўчатлар сотиб олиш учун (БҲМнинг 8 бараваригача) субсидия ажратиш;

— мамлакатимиздаги ОТМларда таълим олаётган "Темир дафтар"га киритилган оилалар фарзандларининг тўлов-контракт суммасининг 50 фоизигача (БҲМнинг 50 бараваригача) тўлаб бериш;

— «Темир дафтар»га киритилган оилаларнинг аҳволи оғир бўлган бемор фарзандларига мамлакатда ёки хорижий давлатларда даволаниш билан боғлиқ харажатларни (БҲМнинг 50 бараваригача) қоплаб бериш;

— психологик маслаҳатга муҳтож ёшларга нисбатан ихтисослашган ННТлар ҳамда НТТлар томонидан пулли психологик хизмат кўрсатилиши билан боғлиқ харажатларни қоплаб бериш;

— «Ёшлар дафтари»га киритилган ёшларга, жумладан, ёш оилаларга турар жой ижараси компенсация қилиш;

— ёшларнинг истеъдодларини қўллаб-қувватлаш, беш муҳим ташаббусни рўёбга чиқариш ва унинг доирасидаги тадбирларни молиялаштириш;

— «Ёшлар дафтари»га киритилган ёшларга тадбиркорлик фаолияти ҳамда ўзини ўзи банд қилиш мақсадида нотурар жойнинг 12 ойгача ижара харажатларини қоплаб бериш;

— «Ёшлар дафтари»га киритилган ёшларга тадбиркорлик фаолиятини бошлаш ҳамда ўзини ўзи банд қилишга зарур бўлган асбоб-ускуналар ва меҳнат қуролларини харид қилиш учун субсидия ажратиш;

— ҳайдовчилик курсларида ўқиш;

— сафарбарлик резерви харажатлари субсидияси.

Юқоридаги субсидиялар Вазирлар Маҳкамаси қарорлари билан тасдиқланган. Ўзингизга қизиқ бўлган субсидия ҳақида кўпроқ маълумот олиш учун киритилган ҳаволанинг устига боссангиз кифоя.

Субсидия олиш учун нима қилиш лозим?

Платформа орқали онлайн ариза қолдирасиз. Ариза қолдирувчи юридик, жисмоний шахс ёки эҳтиёжманд хотин-қизлар учун субсидиялардан бири ҳамда йўналишга оид ташкилот номини танлаши керак бўлади.

Ёшларга оид субсидиялардан бирини олмоқчи бўлсангиз, биринчи қаторга «жисмоний шахсларга», вазирлик ёки идора номига Ёшлар ишлари агентлигини киритасиз. Шунда платформа ёшларга оид субсидияларни чиқариб беради. Шулардан бирини танлайсиз. Лекин унутманг, ҳар бир субсидия ёки компенсация кимларга тўлаб берилиши ҳақида Вазирлар Маҳкамасининг тегишли қарорини кўриб чиқинг. Қарорга ҳавола субсидиялар номининг пастида берилган.

Шунингдек, платформага оид шикоятларни «шикоят қолдириш» бўлими орқали ёзиб юборишингиз мумкин.