Қўшимча функционаллар
-
Тунги кўриниш
Португалияда можаро, Туринда инқироз, Хавида яна ғалаба. Кун ўйинлари якунлари
«Ливерпуль» футболчилари ақл бовар қилмас натижалар қайд этмоқда, Ҳоланд гол билан қайтди, Хави «Барселона»да яна бир ғалабага эришди.
Лиссабондаги абсурд
Аввалига Португалия чемпионатининг 12-тури доирасида «Белененсеш» — «Бенфика» ўйини ҳеч қайси жиҳати билан эътиборни ўзига қаратмаётганди. Аутсайдер турнир етакчиларидан бирини қабул қилди — бу ҳар турда кузатиладиган ҳолат.
Аммо жума куни «Белененсеш»да ковид билан боғлиқ муаммолар пайдо бўлди. Футболчиларнинг 13 нафари, бош мураббий Филипе Кандиду, унинг ассистентлари ва клубнинг икки ходими ўзини иҳоталаш учун юборилди. Record газетаси маълумотига кўра, клубдагилар марказий ҳимоячи Тхибанга Пхете коронавируснинг янги штаммини юқтириб олган бўлиши мумкин (ноябрда ЖАР терма жамоасининг ушбу футболчиси ватанида бўлиб қайтди, бу мамлакатда ковиднинг янги мутацияси — «омикрон» авж олган). Шу туфайли клуб вакиллари ёппасига карантинга кетишди.
Ушбу ҳолат туфайли клуб навбатдаги тур ўйинига тўққиз футболчи топа олди, шундан икки нафари дарвозабон эди. «Белененсеш»нинг биратўла олти футболчиси шанба куни чемпионатда дебют қилди, таркибнинг ўртача ёши тахминан 21 эди. 20 ёшли дарвозабон Жоау Монтейру ўнг қанот ҳимоясида ҳаракатланишига тўғри келди.
«Бенфика» эса асосий таркибни туширди ва 24-сониядаёқ ҳисобни очди — «Белененсеш» ҳимоячиларидан бири ўз жамоаси дарвозасини ишғол этиб қўйди. Бўлим давомида меҳмонлар етти гол уришди, «Бенфика»нинг уругвайлик форварди Дарвин Нуньес ҳет-трик расмийлаштирди.
Танаффус вақтида камералар «Белененсеш» президенти Руй Педру Соарешни намойиш этди, у трибуналар ости ҳудудига кўзда ёш билан чиқиб кетди.
Жамоа узоқ вақт танаффусдан қайтмади — «Бенфика» майдонга чиқиб келиб, чигалёзди машғулотларига киришгач, арбитр «Белененсеш» кийим алмаштириш хонасига борганида мезбон клуб футболчилари майдонга чиқишдан бош тортаётгани маълум бўлди. Лекин улар барибир 20 дақиқалик кечикиш билан майдонга қайтишди, аммо — етти киши бўлиб. Арбитр ўйинни давом эттириш учун ҳуштак чалди, «Белененсеш» футболчиларидан бири эса тўпни майдон ташқарисига тепиб юборди ва газонга ётиб олди — у ҳакамга ўйнай олмаслиги ҳақида ишора қилди.
Ассистентлар билан маслаҳатлашган арбитр ўйинни тўхтатди. Футбол қоидаларига кўра, жамоалардан бирининг таркибидаги футболчилар сони 7 нафардан кам бўлса, ўйинни давом эттириш мумкин эмас. Энди «Белененсеш»га техник мағлубият ёзилади.
Англия: Рамсдейл яна қаҳрамон
«Арсенал» — «Ньюкасл» — 2:0 (Сака, 56. Мартинелли, 66)
«Манчестер Сити»дан 0:5 ҳисобидаги мағлубият қабул қилиб олингач, истеъфога чиқиши ҳақидаги хабарлар фонида Микел Артета «канонирлар» жамоаси билан сентябрдан ноябргача мағлубиятсиз серия қайд этди ва турнир жадвалининг қуйи қисмидан бешинчи ўринга кўтарилди. Энди эса лондонликлар ўтган турда «Энфилд»да қайд этилган 0:4 ҳисобидаги натижага қандай реакция қилиши қизиқ. «Ньюкасл»га қарши ўйиннинг дастлабки 20 дақиқалигида тўпга эгалик қилиш бўйича 80 фоизлик устунлик қайд этилди, кейин Рамсдэйл яна бир бор мўъжиза кўрсатишига тўғри келди, у Шелвининг дарвоза тўсини остига кириб кетаётган зарбасини қайтарди.
Биринчи бўлим охирларида Эдегорнинг бош билан берган зарбасини Дубравка қайтарганида Обамеянг бир метр масофадан туриб бўш қолган дарвозани ишғол этолмаган бўлса-да, иккинчи бўлимда барчаси жой жойига тушди ва мезбонлар ўн дақиқа ичида «қарғалар» мудофаасини сочиб ташлади.
Дастлаб Сака Смит-Роу бошлаб берган ҳужумни гол билан якунлади, кейин у жароҳат олгач ўрнига майдонга тушган Мартинелли тўпга илк тегинишларидаёқ ҳисобдаги фарқни иккитага оширди. «Арсенал» очколар сони бўйича «Вест Ҳэм»га етиб олди, тўплар нисбати яхшироқлиги эвазига тўртинчи ўринда қолаётган Мойес шогирдлари бугун «Манчестер Сити» меҳмони бўлади. Мавсум бошидан буён бирор ғалабага эришмаган «Ньюкасл» сўнгги ўриндан юқори кўтарила олмаяпти.
«Ливерпуль» — «Саутҳемптон» — 4:0 (Диогу Жота, 2, 32. Тиаго Алькантара, 37. ван Дейк, 52)
АПЛнинг жорий мавсумдаги энг тезкор голи ушбу ўйинда урилди - Диогу Жота 97 сонияда ҳисобни очди. Айтиш мумкинки, португалиялик футболчи виртуал футбол ритмидан реал футболга ўтишга ҳам улгурмаганди. Тонгда Жота FIFA 22 бўйича мусобақа саралашида иштирок этди ва ўз чиқишини «Энфилд»даги ҳақиқий ўйин учун тўхтатди. Форвард ўйинда дубль қайд этди ва голларини киберфутболда машҳур бўлган гол нишонлаш услубида нишонлади.
Финал ҳуштаги янграганида айни вақтда АПЛнинг энг яхши уч тўпурари Ливерпулда экани ойдинлашди — 11 марта гол урган Салоҳ ва еттитадан голга муаллифлик қилган Жота ва Мане. Сенегаллик футболчи оқшомдаги илк голли ҳужумда қатнашиб, тўпни икки ҳимоячи орасидан ўтказиб, жарима майдонига етказиб берди, Робертсон эса голли узатма муаллифига айланди. Бошқа бир ҳимоячи-плеймейкер ҳам ундан қолишишни истамади — Александр-Арнолд клуб ва терма жамоа учун сўнгги беш ўйинда тўққиз ассист муаллифига айланган.
Иккинчи бўлим бошидаёқ ўйинга амалда нуқта қўйган голни яна бир ҳимоячи ван Дейк урганди, у албатта собиқ жамоасига урилган голни нишонламади.
Италия: «Ювентус» инқирозда
«Ювентус» — «Аталанта» — 0:1 (Сапата, 28)
Туринликлар майдонга 2019-2021 йиллардаги трансферлар атрофида юзага келган можаро фонида майдонга чиқишди. Бир ой олдин эълон қилинган текширув доирасида прокуратура 42 келишувни, жумладан «Манчестер Сити» (Жоау Канселу — Данилу) ва «Барселона» (Пьянич — Артур) билан алмашувларни гумон остига олган. Гап трансферлар суммаси ва агентларга комиссия тўловлари ошириб кўрсатилгани ҳақида кетмоқда, суриштирувларда ёлғон маълумотлар ишлатилгани аниқланган. Бу «Ювентус» президенти Андреа Аньелли, вице-президент Павел Недвед ва собиқ спорт директори Фабио Паратичига қимматга тушиши мумкин. Шанба куни клуб офисларига молия полицияси вакиллари ташриф буюришди.
«Аталанта»нинг Туринга ташрифи ҳам мезбонлар учун ёқимсиз кечди, ўйиннинг биринчи қисмидаёқ Сапата ҳимоячилардан қочиб кетган ҳолда ғалаба голини урди. Колумбиялик форвард — «бьянконери» бўйича ҳақиқий эксперт, у ушбу жамоага қарши сўнгги 11 ўйинда 8 гол уриб улгурди. Аммо у сафар ўйинларида урган гол шу вақтгача жамоага ёрдам бермай келаётганди, қолаверса бергамоликларнинг бу ғалабаси туринликларга қарши ўйинларда 1989 йилдан буён сафардаги илк ғалабадир, ўшанда Клаудио Каниджининг голи «Юве» устидан ғалаба келтирганди. Энди Массимилиано Аллегри жамоаси тўртинчи ўриндаги «Аталанта»дан етти очкога ортда қолмоқда. Мезбонлар сўнгги дақиқаларда ўйинни қутқариши мумкин эди, аммо Дибаланинг жарима зарбаси дарвоза тўсинига тегди.
Туринликлар мавсум бошидан буён (августда «Эмполи»га 0:1, сентябрда «Наполи»га 1:2, октябрда «Сассуоло»га 1:2, ноябрда «Верона»га 0:1, «Челси»га 0:4 ва энди «Аталанта»га 0:1), ноябрь ойининг уч бор мағлубият «Кекса синьора» билан 1948 йилдан буён кузатилмаганди.
«Венеция» — «Интер» — 0:2 (Ҳоқон Чалхонўғли, 34. Мартинес, 90+6, пенальтидан)
Терма жамоалар танаффусидан кейинги даврда амалдаги чемпионлар яхши формада - етти кун ичида уч ўйинда уч ғалаба. Миланликлар дастлаб «Наполи»га мавсумдаги илк мағлубиятни тақдим этишди, кейин «Шахтёр» билан ўйинда Чемпионлар лигаси плей-офф йўлланмаси ҳал этилди, энди эса Венециядаги ўйинда уч очко қўлга киритилди.
Бу сафар ҳам Ҳоқон Чалханўғлининг голи ҳал қилувчи гол бўлди, у фаолиятида илк бор миллий чемпионатда қаторасига уч ўйинда гол урди. 2013/14 йилги мавсумда, бундеслигада дебют қилганидан буён ушбу туркиялик узоқ масофалардан йўллаган зарбалари билан 26 бор рақиб жамоалар дарвозабонларини ранжитган. У бу борада Кристиан Эриксен билан бир хил натижага эга, улардан олдинда фақат Лео Месси.
Испания: «Барса»нинг омади келди
«Вильярреал» — «Барселона» — 1:3 (Чуквуэзе, 76 — Ф.де Йонг, 48. Депай, 88. Филиппе Коутинью, 90+4, пенальтидан)
Ўйиннинг илк дақиқалариданоқ Унаи Эмери ва Хави шогирдлари шанба оқшомининг энг яхши ўйинини ўтказиш учун жонбозлик кўрсатишди, томонлар навбатма-навбат хавфли ҳужумлар уюштирди. Каталонияликлар ҳимоясини Данджума доимий равишда таҳликага солиб турди, унинг хавфли зарбасини Тер Штеген бир амаллаб қайтарди. Кўк-анорранглиларнинг жавоб ҳужумида Депай яккама-якка ҳолатга чиқиб бориб, гол уролмади, кейинроқ унинг узатмасидан кейин Гавининг бош билан берган зарбаси дарвоза тўсинига тегиб майдондан чиқиб кетди.
Биринчи бўлимда гол урилмагани ўйиндаги жараёнга мос эмасди, иккинчи бўлим бошида эса арбитрлар Френки де Йонгнинг голини ҳисобга олишмади, лекин ВАР вазиятга аралашиб, ҳакамлар хато қарор қилганини кўрсатиб берди - бир неча дақиқалик кузатувлардан кейин Жорди Албанинг узатмасига оёқ қўйган Депай офсайдда бўлмагани маълум қилинди.
Аммо ҳозирги «Барселона» ҳали юқори спорт формасига чиқмаган ва уларда кучли захира ҳам йўқ. Улар ўз муваффақиятини ривожлантира олишмади ҳамда Данджума ва Чуквуэзенинг голли комбинациясини ўтказиб юборишди. Ўйин охирларида улар иккинчи голни ҳам қўйиб юбориши мумкин эди. Аммо кўк-анорранглилар синовни енгиб ўтишди ва ғалабани ўзиники қилди, бу вазиятда Тер Штеген тўпни куч билан тепиб рақиб жарима майдони томон етказиб берди ва ҳимоячи тўпни боши билан ўз дарвозабонига ошириб беришда хатога йўл қўйганида Депай бу совғадан фойдаланиб, маҳорат ва совуққонлик билан ғалаба голини урди. Ушбу нидерландиялик қаторасига тўртинчи турда гол урмоқда, Хавининг эса омади келмоқда, «Барса» мавсумдаги илк сафар ўйинидаги ғалабага эришди.
«Валенсия» — «Райо Вальекано» — 1:1 (Солер, 19, пенальтидан — Палазон, 64)
Октябрь ойида жароҳат олган Денис Черишев майдонга қайтди. «Реал Сосьедад»га қарши ўйинда россиялик яримҳимоячи захирада қолганди, шанба куни у 82-дақиқада майдонга тушди. Аммо ўйиннинг қолган дақиқаларида «кўршапалаклар» ғалабани илиб кета олмади, улар бу вақтда гол ўтказиб юбориб мағлуб бўлиши ҳам мумкин эди, «Райо» сўнгги дақиқаларда иккита яхши имкониятга эга бўлди. Бу ўйинда «Валенсия»нинг ягона голига муаллифлик қилган Солер ла лигада урган голларининг 46 фоизини — 24тадан 11тасини — пенальтидан урган.
Германия: «Бавария»нинг янги рекорди
«Вольфсбург» — «Боруссия» Д — 1:3 (Вегҳорст, 2 — Эмре Жан, 35, пенальтидан. Мален, 55. Ҳоланд, 80)
Чемпионлар лигасидан чиқиб кетган «Боруссия» Вольфсбургда ирода кўрсатди, дортмундликлар бу ерда қаторасига еттинчи ўйинда ғалабага эришди. Ўйин бошида тезкор гол ўтказиб юборилди, аммо шундан кейин бу сафар Бундеслигада сариқ-қора формада 300-ўйинида майдонга тушган Ҳуммельс бошчилигидаги ҳимоя ишончли ўйин кўрсатди.
Эмре Жан пенальтини аниқ ижро этиб, ўйинда бурилиш ясади ва Лиссабондаги ўйиндаги қўполлиги ва майдондан четлатилиши билан жамоани қийин аҳволга солиб қўйгани учун мухлислар олдида ўзини бироз оқлади. Кечанинг асосий воқеаси эса бир ойдан ошиқ вақт давом этган танаффусдан кейин Ҳоланднинг қайтиши бўлди. Норвегиялик форвард захирадан майдонга чиққанидан кейин ўз номини таблога ёздириб қўйиши учун етти дақиқа етарли бўлди, у ўзининг ақл бовар қилмас графигини давом эттирди — Германия чемпионатида 50 ўйинда 50 гол. Турнир тарихида ҳеч ким бунчалик тез (21 ёш, 4 ой ва 6 кун) ва бу қадар ёшлигида бундай кўрсаткич қайд эта олмаган.
Шифокорлар прогнозида айтилганидан бир ой олдин тикланган Ҳоланд голини оригинал услубда нишонлади, бу ҳолат кейин интернетда ҳитга айланди - унинг голидан ранжиган «бўрилар» мухлисаси қаршисига келган рақиб форвардига ҳақоратли жест билан жавоб қайтарганди. Аммо ёш форвардда юмор туйғуси етарли эди. У Twitter саҳифасида ушбу мавзудаги мем ва видеороликларни жойлаштириб, шундай деди: «Бу чиндан кулгили. Айнан шунинг учун биз футболни яхши кўрамиз». Шунингдек, у ўйин трансляцияси операторига ўйиннинг бош қаҳрамони учун мукофот топширишни тавсия этди.
«Бавария» — «Арминия» — 1:0 (Сане, 71)
Мюнхен клубида антиваксерлар билан боғлиқ тарих давом этмоқда. Аввалги ҳафтада карантинга юборилган 5 футболчидан икки нафари — Киммиҳ ва Шупо-Мотингга шу кунларда коронавирус ташхиси қўйилди. Агар улар сафда бўлганида «Бавария» ҳозиргидан кучлироқ бўларди ва Юлиан Нагельсманн илк дақиқаларданоқ майдонга Франциядан бўлган беш легионерни ташлашига тўғри келмасди. «Бавария»нинг муаммолари бу билан ҳал бўлиб қолмади, аммо ўйин охирлаб қолганида Сане «тўққизлик»ка йўлланган чиройли зарбаси билан ғалаба келтирди ва шу билан бирга тарихий гол муаллифига ҳам айланди. Бу баварларнинг йил бошидан буён урилган 102-голи бўлди, бу эса Германия чемпионати рекордидир. Мюнхен ҳамон биринчи ўринда, аммо бир ҳафтадан кейин «Боруссия»га қарши немис класикоси бўлиб ўтади.
Кун статистикаси
- Бундеслига тарихида қаторасига 11 ўйинда мағлубиятга учраган илк жамоа «Гройтер Фюрт» бўлди.
- Лига 1нинг жорий мавсумида пенальтини қайтарган илк дарвозабон «Нант» вакили Лафонт бўлди.
- Жеррард — «Астон Вилла» тарихида АПЛдаги дастлабки икки ўйинида ғалаба қозонган 2-мураббий. Бундан аввалги ҳолат 1998 йилда кузатилган, ўшанда бирмингемликлар бошқарувига Жон Грегори келганди.
- Туркиянинг амалдаги чемпиони «Бешиктош» дарвозасига «Гиресунспор» 4та жавобсиз гол урди, бу ушбу клубнинг суперлигадаги энг йирик ғалабаси. Амалдаги чемпионлар ички чемпионатда қаторасига тўртинчи ўйинда мағлубиятга учради (ЕЧЛ гуруҳида «Аякс»га қарши ўйин билан жами 5) ва 10-ўринга тушиб кетди.
- Италия чемпионатининг энг яхши тўпурари бўлиб турган Влаҳович йил бошидан буён «Фиорентина» учун 28-голини урди. Ушбу сербиялик клуб рекордини такрорлади, рекорд 1960 йилда Курт Хамрин томонидан ўрнатилганди.
- «Сентенарио» стадионида 21-марта Либертадорес Кубоги финали бўлиб ўтди ва унда «Палмейрас» сўнгги дақиқадаги гол эвазига «Фламинго»ни мағлуб этди.
