“Тошкент шаҳар электр тармоқлари корхонаси” АЖ Тошкентдаги Россия кимё-технология университети филиалига ўрнатилган қуёш электр станциясида ишлаб чиқарилган электр энергиясини сотиб олиш учун шартнома имзолади. Бу ҳақда акционерлик жамияти матбуот хизмати хабар берди.
21 декабрь куни Д.И.Менделеев номидаги Россия кимё-технология университетининг Тошкент шаҳридаги филиали маъмурияти ҳамда “Тошкент шаҳар электр тармоқлари корхонаси” АЖ ўртасида “Қайта тикланувчи энергия манбаларининг кичик объектларидан ишлаб чиқарилган электр энергиясини сотиб олиш тўғрисида” шартнома имзоланди.
Ушбу амалиёт Вазирлар Маҳкамасининг 2019 йил 22 июлдаги 610-сон қарори билан тасдиқланган “Электр энергияси, шу жумладан, энергиянинг қайта тикланадиган манбаларидан электр энергияси ишлаб чиқарадиган тадбиркорлик субъектларини ягона электр энергетика тизимига улаш регламенти”га асосан амалга оширилмоқда.
Қайд этилишича, университетда 2021 йилнинг февраль ойида ишга туширилган қуёш станцияси 1 200 квадрат метр майдонда жойлашган бўлиб, бу ерда мамлакатимизда ишлаб чиқарилган ҳар бирининг қуввати 350 Вт бўлган 288 дона қуёш панеллари ўрнатилган.
Аввалроқ, Тошкентда яшовчи фуқаро ўз уйида қуёш панели орқали ишлаб чиқарилган электр энергиясини давлатга сотишни бошлагани ҳақида хабар берилган эди.
