Ўзбекистон Ташқи сиёсий фаолиятининг янги концепцияси жамоатчилик муҳокамаси учун эълон қилинади

Учрашув давомида вазирлик ва дипломатик ваколатхоналарнинг жорий йилдаги фаолияти якунлари кўриб чиқилди, 2022 йилга мўлжалланган устувор вазифалар белгилаб олинди ва аниқ топшириқлар берилди.

Вазирлик матбуот хизмати хабарига кўра, ҳайъат йиғилишида Ўзбекистон Ташқи сиёсий фаолиятининг янги концепцияси лойиҳаси ҳам муҳокама қилинган.

“Иқтисодий дипломатия масалаларига, жумладан, дипломатик миссиялар раҳбарларининг жойлардаги вазиятни ўрганиш мақсадида Ўзбекистон вилоятларига амалга оширган сафарлари, савдо-иқтисодий соҳадаги лойиҳаларни муҳокама қилиш ва амалга ошириш учун вазирлик ва идораларида ўтказган учрашувларининг натижаларига алоҳида эътибор қаратилди”, – дейилади вазирлик баёнотида.

Эслатиб ўтамиз, 27 декабрь куни хорижий давлатларнинг Ўзбекистонга янги тайинланган элчиларида ишонч ёрлиқларини қабул қилиб олган президент Шавкат Мирзиёев Ўзбекистон Республикаси Ташқи сиёсий фаолияти концепцияси янги таҳрирда қабул қилинишини маълум қилган эди.

Концепцияни такомиллаштириш 2021 йилги давлат дастурига ҳам киритилганди. Дастурда, 1 декабргача тегишли норматив-ҳуқуқий ҳужжат лойиҳаси ишлаб чиқилиши белгиланган.

Kun.uz билан мулоқот қилган Ташқи ишлар вазирлиги расмий вакили Юсуфбек Қобилжоновга кўра, айни дамда Ташқи сиёсий фаолиятининг янги концепцияси лойиҳаси элчилар, дипломатлар ва бошқа мутахассислар томонидан кўриб чиқилмоқда.

«Лойиҳа доирасида ишлар якунланган, у албатта жамоатчилик муҳокамаси учун эълон қилинади», деди ТИВ расмийси.