Қашқадарёда таниқли спортчи Элбек Раҳимовнинг ўлдирилгани юзасидан навбатдаги суд мажлиси бўлиб ўтди

Маълум бўлишича, бугун 2022 йил 13 январ куни бўлиб ўтган суд мажлисида Қашқадарё вилояти судининг жиноят судлов ҳайъати судяси Ф.Юсупов ОАВ вакиллари ва блогерларга суд жараёнини тасвирга олишга рухсат берган. Аммо тарафларнинг кўрсатмаларини суд ҳукми эълон қилингунча ОАВ ва ижтимоий тармоқларда ёритишни тақиқлаган.

Судда айбланувчилардан бирининг адвокати суд раисидан суд мажлисида прокурор иштирокини рад этиш бўйича илтимоснома киритган. У бу илтимосини суд ишида прокурорларга тегишли кўрсатмалар ҳам борлигини, улар кўриб чиқилмагани ҳамда ҳуқуқий баҳо берилмагани билан изоҳлаган.

Судда қатнашаётган прокурор эса суддан бу илтимосномани қаноатлантирмасликни сўраган.

Эслатиб ўтамиз, Элбек Раҳимов ўлими юзасидан 26 нафар шахсга айблов эълон қилинган. Улар Жиноят кодексининг 97, 28, 104, 105, 109, 127, 137, 169, 210, 211, 230, 238, 241-1 ва 277-моддаларида назарда тутилган жиноятларни содир этганликда айбланмоқда. Суд жараёни давом этмоқда