Саргузаштларга иштиёқманд 75 ёшли француз Жан-Жак Савен океанни ёлғиз кесиб ўтиш бўйича иккинчи саёҳати чоғида ҳалок бўлди - у Атлантикадан эшкакли қайиқда ўтмоқчи бўлган.
Жума куни Савеннинг ағдарилиб кетган қайиғи Азор ороллари яқинида, у саёҳатини бошлаган Португалия қирғоқларидан тахминан 1,5 минг километр масофада топилди.
Савеннинг ўлими сабаби ва бошқа тафсилотлар ҳозирча маълум эмас.
«Афсуски, бу сафар океан бизнинг денгизни ва у бўйлаб саёҳатларга чиқишни ёқтирадиган дўстимиздан кучли чиқди», дейилади Савеннинг Фейсбукдаги саҳифасида.
Савен Атлантика океани оша иккинчи сафарини 1 январь куни Португалиянинг Сагреш портидан бошлаганди. Биринчи сафар у уч йил муқаддам махсус ясалган бочкада бу ишни уддалаган.
Пайшанбага ўтар кечаси Савен икки марта ҳалокат сигнали юборган. Шундан кейин у билан боғланишнинг имкони бўлмаган.
Ундан олдинроқ, чоршанба куни у фейсбукдаги саҳифасида кучли шамоллар унинг саёҳатини 900 километрга узайтиргани ва унда қуёш панели билан муаммо юзага келганини ёзган, шу билан бирга, ўқувчиларини қўрқинчли ҳолат йўқлиги ва Азор ороллари пойтахти Понта-Делгадога етиб олиши биланоқ муаммоларни бартараф этишига ишонтирганди.
Собиқ ҳарбий, кейин хусусий учувчи бўлган Савен ўтган ҳафтада ўз қайиғида 75 ёшини нишонлаганди. У бу ташаббусини «кексалик устидан кулиш воситаси» деб ҳисоблаганди.
