“Оларда кирар жоним...” Жомбой солиқ идораси тошкентлик тадбиркорни 1,5 млрд сўмга “кийдирмоқда”  

Kun.uz’га Жомбой туманида фаолият юритган тадбиркор суд қарори бўлишига қарамай, солиқчилар ортиқча ундирган 1,5 миллиард сўм пулини ололмаётгани ҳақида гапириб берди. Тадбиркор Азизхон Нуриддинов тақдим этган ҳужжатларга кўра, солиқчилар уни 3 йилдан бери қийнаб келади.

Тадбиркор охирги 1 ой ичида икки марта Самарқанд вилоят ҳокими Эркинжон Турдимов қабулида бўлган. Энг сўнгги қабулда вилоят ҳокими масалани ўрганиб чиқиб, тегишли хулоса қилишни вилоят адлия бошқармаси бошлиғига топширади. Тадбиркорнинг сўзларига кўра, Турдимов қабулидаги солиқ идораси вакиллари ва мурожаатчиларга қарата “Адлия қандай хулоса қилса – ўша бўлади” дейди. Орадан кўп ўтмай, Адлия бошқармаси ўзи хулосасини вилоят ҳокимига тақдим этади.

Аниқланишича, Ўзбекистон Республикаси Бош прокуратураси Ўта оғир жиноятларни тергов қилиш бошқармаси терговчисининг А.Юлдашев, А.Нуритдинов ва бошқаларга нисбатан қўзғатилган 17/18-31-сонли жиноят иши бўйича 2018 йил 14 июндаги қарори билан “Нехт Фарм” ва “Нф Нехт Фарм Бусинесс” МЧЖлар фаолияти юзасидан ҳужжатли тафтиш тайинланган.

Ўтказилган ҳужжатли тафтиш натижасида, “Нехт Фарм” МЧЖга нисбатан

8 млрд 283 млн сўм, “Нф Нехт Фарм Бусинесс” МЧЖга нисбатан 778,5 млн сўм, жами 9 млрд 62 млн сўм солиқ ва бошқа мажбурий тўловлар ҳисобланган.

Текшириш натижаси юзасидан Жомбой туман давлат солиқ инспекциясининг 2018 йил 12 сентябрдаги даъво аризаларига асосан Жомбой туман иқтисодий судининг 2018 йил 10 октябрдаги ҳал қилув қарори билан “Нехт Фарм” МЧЖга нисбатан 19 648,4 млн сўм миқдорда молиявий жарима қўлланилган.

Жомбой туман давлат солиқ инспекцияси томонидан “Нехт Фарм” МЧЖни соддалаштирилган тартибда банкрот деб топиш ҳақида даъво ариза киритилган. Жомбой туманлараро иқтисодий судининг 2020 йил 23 июндаги тугатишга доир иш юритиш таомилини тамомлаш тўғрисидаги ажримига асосан “Нехт Фарм” МЧЖни тугатишга доир иш юритиш таомили тамомланиб, мазкур жамият давлат реестридан чиқарилган.

“Нехт Фарм” МЧЖ банкрот деб топилганлиги сабабли Жомбой туман давлат солиқ инспекциясининг 2020 йил 26 июндаги 12-сонли қарори билан жамиятнинг 25 млрд 288 млн сўм солиқ қарзи ва молиявий жарима ҳисобдан чиқарилган.

Жиноят ишлари бўйича Тошкент шаҳар Учтепа туман судининг 2018 йил 25 декабрдаги ҳукми билан А.Нуритдинов Жиноят кодексининг 28,179-моддаси, 28,184-моддаси учинчи қисми, 28,189-моддаси биринчи қисми, 28,190-моддаси иккинчи қисмининг “а”, “б”, “в” бандлари, 228-моддаси иккинчи қисмининг “а”, “б” бандлари билан айбли деб топилиб, тегишли жазо тайинланган.

Мазкур ҳукм билан дастлабки терговда тафтиш натижасида аниқланган жами 9 млрд 62 млн сўм солиқ ва бошқа мажбурий тўловлардан қарздорлик дастлабки терговда ва суд жараёнида жамиятларга тегишли хатланган мол-мулклар ҳисобидан солиқ ва мажбурий тўловларнинг 3 млрд 909 млн сўм қисми (ЖИБ Тошкент шаҳар суди кассация инстанциясининг 2021 йил 21 январдаги ажрими билан мазкур суднинг 2020 йил 24 декабрдаги ҳукмга тушунтириш берилиб, солиқ ва мажбурий тўловларнинг 4 млрд 89 млн сўм) қопланган.

Жиноят ишлари бўйича Тошкент шаҳар суди кассация инстанциясининг 2019 йил 8 октябр ва 2020 йил 24 декабрдаги ажрими билан “Нехт Фарм” ва “Нф Нехт Фарм Бусинесс” МЧЖларга нисбатан қўшимча ҳисобланган солиқ ва бошқа мажбурий тўловлар жами 9 млрд 62 млн сўм ўрнига экспертиза хулосасига асосан 2 млрд 577 млн сўм деб топилиб, ортиқча ундирилган (3 млрд 909 млн сўмга нисбатан) 1 млрд 332 млн сўм – суд ажрим билан тузатишига асосан 4 млрд 89 млн сўмга нисбатан 1 млрд 512 млн сўм судланувчи А.Нуритдинов (ҳукмга тузатиш киритилиб А.Юлдашев)га қайтариш белгиланган ҳамда фуқаролар А.Нуритдинов, А.Юлдашев ва А.Ортиқовдан солидар тартибда давлат фойдасига ундириш белгиланган жами 5 млрд 152 млн сўм солиқ қарздорлик қисми бекор қилинган.

Ўзбекистон Республикаси Олий суди жиноят ишлари бўйича судлов ҳайъатининг 2021 йил 27 августдаги ажрими билан Жиноят ишлари бўйича Тошкент шаҳар суди кассация инстанциясининг 2020 йил 24 декабрдаги ажрими ўзгаришсиз қолдирилган.

“Судлар тўғрисида”ги Ўзбекистон Республикаси Қонунига асосан қонуний кучга кирган суд ҳужжатлари барча давлат органлари, жамоат бирлашмалари, корхоналар, муассасалар ва ташкилотлар, мансабдор шахслар, фуқаролар учун мажбурийдир ҳамда Ўзбекистон Республикасининг бутун ҳудудида ижро этилиши шартлиги белгиланган.

Суд ҳужжатларини ижро этиш Ўзбекистон Республикаси Бош прокуратураси ҳузуридаги Мажбурий ижро бюросининг давлат ижрочилари зиммасига юклатилган.

Тошкент шаҳар суди кассация инстанциясининг 2020 йил 24 декабрдаги ажрими билан фуқаро А.Юлдашевга қайтариш белгиланган 1.512.661.999 сўм маблағлар Жомбой туман давлат солиқ инспекцияси томонидан Мажбурий ижро бюроси Жомбой туман бўлими орқали қайтариб берилиши лозим, дейилади Адлия бошқармаси хулосасида.

Аммо, лекин, бироқ...

Мазкур хулоса шу йил 1 феврал куни Турдимовга тақдим этилди. Турдимов ваъдасига мувофиқ хулосани 1 ҳафта ичида (7 февралга қадар) ижросини таъминлаб қўйиш кераклиги уқтирилган “фишка” билан Самарқанд вилоят Солиқ бошқармаси бошлиғи А.Инагамовга юборади.

Эркинжон Турдимовнинг “фишка”си солиққа юборилганига ҳам яқинда 1 ой тўлади. Самарқанднинг солиқчиларига эса қонунлар, суд қарорлари, адлияни хулосалари-ю вилоят ҳокимининг топшириғи бир тийин экани яна бир бор тасдиғини топмоқда.

Темур Турсунбоев Kun.uz мухбири