Расмий баёнотда қайд этилишича, фуқаролик ишлари бўйича Миробод туманлараро судининг ҳали қонуний кучга кирмаган ҳал қилув қарорининг асослилиги Бош прокуратура томонидан атрофлича ўрганилади.
Тошкент шаҳар судларининг расмий Telegram-канали орқали Бош прокуратура собиқ ходими, марҳум С.Раҳмоновнинг турмуш ўртоғи Н.Раҳмонованинг фойдасига суд қарори асосида “Бош прокуратура 1 миллиард сўм тўлаб бериши” ҳақидаги хабар тарқалмоқда.
Мазкур хабар юзасидан қуйидагилар маълум қилинади:
- биринчидан, прокуратура органлари тизимидаги ҳар бир ходим ва унинг оила аъзоларининг муносиб ижтимоий ҳимоя қилинишидан биринчи навбатда Бош прокуратуранинг ўзи манфаатдордир;
- иккинчидан, ҳар қандай ижтимоий ҳимоя, хусусан нафақа пулларининг тўлови қонунга сўзсиз риоя қилинган ҳолда амалга оширилиши шарт.
Айниқса, бюджет интизомига риоя этилишини назорат қилишга масъул бўлган, айнан бюджетдан молиялаштириладиган прокуратура органларида бу тамойил устувор аҳамиятга эга.
- Бинобарин, марҳум ходим С.Раҳмоновнинг вафоти муносабати билан унинг яқинларига тегишли тўловлар қонунда белгиланган энг юқори миқдорда тўлаб берилган;
- учинчидан, ҳали қонуний кучга кирмаган фуқаролик ишлари бўйича Миробод туманлараро судининг Н.Раҳмонова даъволарини қисман қаноатлантириш тўғрисидаги ҳал қилув қарорининг асослилиги Бош прокуратура томонидан атрофлича ўрганилади ва тегишли муносабат билдирилади.
Зотан, амалиётда ҳатто қотилликда ва бошқа оғир жиноятларда айбланган фуқароларнинг қуйи инстанция судлари томонидан асоссиз оқлангани ёки аксинча, айбсизлар айбдор деб топилгани, прокуратуранинг саъй-ҳаракатлари билан эса, адолат қарор топганига оид кўплаб маълумотлар жамоатчиликка яхши маълум.
Шу боис, судлар томонидан ҳали қонуний кучга кирмаган қарорлар юзасидан шошмашошарлик билан жамоатчиликка ахборот беришнинг мақсадга мувофиқ эмаслигини яна бир карра таъкидлаймиз”, дейилади расмий баёнотда.
Эслатиб ўтамиз, фуқаролик ишлари бўйича Миробод туманлараро судининг 2021 йил 17 сентябрдаги ҳал қилув қарори билан, даъвогар – Аъзамжон Раҳмоновнинг жавобгар – Бош прокуратурага нисбатан фарзанди вафоти муносабати билан иш жойидан нафақа пули ҳамда маънавий зарар ундириш тўғрисидаги даъво ва қўшимча даъво аризалари рад қилинганди.
Шундан сўнг даъвогар фуқаролик ишлари бўйича Тошкент шаҳар судига ФИБ Миробод туманлараро судининг ҳал қилув қарори устидан апелляция шикояти киритганди. Апелляция шикояти Тошкент шаҳар суди фуқаролик ишлари бўйича судлов ҳайъати томонидан кўриб чиқилиб, судлов ҳайъатининг ажрими билан биринчи инстанция судининг ҳал қилув қарори бекор қилиниб, иш янгидан кўриш учун биринчи инстанция судига юборилганди.
Аъзамжон Раҳмонов Kun.uz'га берган интервьюсида ўлим сабабини аниқлаш бўйича суд-тиббий экспертизаси ўтказилмагани, Самир Раҳмоновнинг жасадини экспертизага олиб бормоқчи бўлишганда у ўғлининг танаси ёрилишига рози бўлмаганини айтган, бу ҳаракатини ўлим сабаби экспертизасиз ҳам рўйи-рост маълумлиги, фарзандининг бош миясида қон томирлари ёрилгани яққол кўриниб тургани билан изоҳлаганди.
Шунингдек, марҳумнинг яқинлари ҳодиса рўй берган куни иш берувчи – Бош прокуратура меҳнат инспекцияларини жалб қилиб, ходимининг ўлими юзасидан суриштирув ўтказмагани, қонунчиликда белгиланган тартибда далолатномалар тузмаганини айтишганди.
Суд мазкур ҳолатларда қонунчилик талаби бузилган деб топган ва ишни пухта ўрганмагани учун 2021 йил 6 декабрь куни судлов ҳайъатининг ажрими билан РСТЭИАМ Тошкент шаҳар филиали Морфология бўлими Сергели пунктининг давлат суд тиббий экспертизаси бошлиғи ҳамда Тошкент шаҳар Бандлик бош бошқармаси Давлат меҳнат ҳуқуқ инспекцияси бошлиғига нисбатан хусусий ажримлар чиқарган.
Иш биринчи инстанция судида қайта кўрила бошлаганда Аъзамжон Раҳмонов оламдан ўтган эди.
Тошкент шаҳар суди матбуот хизмати хабар беришича, марҳум Аъзамжон Раҳмоновнинг жавобгар Ўзбекистон Республикаси Бош прокуратурасига нисбатан боқувчисининг вафоти муносабати билан нафақа пулини ундириш ва маънавий зарарни қоплаш тўғрисидаги даъво аризасини кўриб чиқиш бўйича суд жараёни ниҳоясига етиб, суд қарори эълон қилинган.
Суднинг 2022 йил 10 мартдаги ажрими билан даъвогар Аъзамжон Раҳмонов вафот этганлиги сабабли унинг жавобгар Ўзбекистон Республикаси Бош прокуратурасига нисбатан боқувчисининг вафоти муносабати билан нафақа пулини ундириш ва маънавий зарарни қоплаш тўғрисидаги даъво аризаси иш юритувидан тугатилган.
Суд ташаббуси билан даъвогар томонидан мустақил талаб билан арз қилувчи учинчи шахс сифатида жалб қилинган марҳум Самир Раҳмоновнинг беваси – Н.Раҳмонова судга жавобгар Ўзбекистон Республикаси Бош прокуратурасига нисбатан турмуш ўртоғининг иш жойида вафоти муносабати билан вояга етмаган фарзандлари ва ўзи учун нафақа, суғурта товони ва маънавий зарар ундириш тўғрисидаги даъво аризаси билан мурожаат қилган.
Фуқаролик ишлари бўйича Миробод туманлараро судининг 2022 йил 28 мартдаги ҳал қилув қарорига асосан Н.Раҳмонованинг жавобгарга нисбатан боқувчисининг вафоти муносабати билан нафақа пулини ундириш ва маънавий зарарни қоплаш ҳақидаги даъво талаблари қисман қаноатлантирилган.
Суд қарори билан Бош прокуратура Н.Раҳмонованинг фойдасига 951 275 952 сўм миқдорида бирйўла тўланадиган нафақа пули ва 20 000 000 сўм миқдорида маънавий зарар ундирилиши ҳамда давлат фойдасига 76 642 076 сўм давлат божи тўланиши белгиланган.
