Францияда Алишер Усмоновга тегишли иккита вертолёт хатловга олинди

Россиялик олигархга тегишли дейилаётган, жами суммаси 26 миллион АҚШ доллар турадиган ҳар икки вертолёт Британияга қарашли Мэн оролида рўйхатга олинган, деб ёзмоқда Forbes.

Гап борт рақамлари M-DLBR бўлган Airbus EC-175 ҳамда M-DLBA бўлган Eurocopter EC-155 вертолётлари ҳақида бормоқда. Маълум қилинишича, вертолётлар хатловга олинган чоғда улардан бири Ле-Кастелледа, иккинчиси Монте-Карлода бўлган.

Расман M-DLBR Crystal Sky Limited компаниясига, M-DLBA эса Margaux Aviation Limited компаниясига тегишли. Ҳар икки фирма Кайман оролларида жойлашган.

Алишер Усмонов 28 феврал куни Европа Иттифоқининг санкция рўйхатига киритилган эди. Вертолётлар эса 3 март куни Мэн ороли авиация ҳокимиятининг қайд этиш рўйхатидан чиқарилган. Энди улар бошқа давлатда рўйхатдан ўтказилмагунига қадар Алишер Усмонов улардан фойдалана олмайди, деб ёзади нашр.

Усмоновнинг вакили вертолётлар олигархга тегишли эмаслигини айтган. «Мулкнинг катта қисми, жумладан икки вертолёт ҳам чақириб олинмас трастларга топширилган. Жаноб Усмонов уларнинг эгаси эмас. Мулкни оилавий трастларга топшириш жараёни кўп йиллар аввал бошланган ва на бойликни яшириш, на санкциялардан қочиш билан боғлиқликка эга», — деган у.

Forbes нашрининг қайд этишича, Margaux Aviation Limited’нинг Усмонов билан боғлиқлик жойи бор, чунки аввал унга тегишли Airbus A340 Bourkhan самолётининг эгаси шу компания бўлган. M-DLBR вертолёти эса олигархнинг 588 миллион долларлик, 512 фут узунликка эга, аввалроқ Германияда хатловга олинган Dilbar суперяхтаси устида суратга олинган.

Алишер Усмонов «Dilbar»ни 2016 йилда Lurssen кемасозлик компаниясидан 588 млн долларга сотиб олган. Яхта 52 ой давомида қуриб битказилган. «Dilbar» 15 917 тонна сув сиғими билан дунёдаги энг катта моторли яхта ҳисобланади. Унда улкан бассейн, иккита вертолёт майдончаси, сауна, гўзаллик салони ва спорт зали бор. Яхтанинг 12та люкс хонасига 24 киши жойлашиши мумкин.

Эслатиб ўтамиз, аввалроқ Мэн ороли авиация ҳокимияти россиялик олигархлар, жумладан Алишер Усмоновга тегишли самолёт ва вертолётларнинг қайд этиш ҳужжатларини бекор қилган эди.

68 ёшли Алишер Усмонов — Россиянинг энг бадавлат инсонларидан бири. Унинг энг йирик активи «Металлоинвест» металлургия гигантидаги улуши ҳисобланади. У шунингдек, Хитойнинг Xiaomi маиший электроника компанияси акцияларига эга.