«Атлетико» жанжал билан якунлади, «Ливерпуль» 3та гол ўтказиб ҳам яримфиналга чиқди

Атлетико — Манчестер Сити 0:0
Атлетико – Облак, Савич, Фелипе, Рейнилду, Лоди (Корреа, 70), Лемар (Суарес, 82), Коке (де Пауль, 69), Кондогбиа, Льоренте, Гризманн (Карраско, 69), Фелиш (Матеус Кунья, 82). 
Манчестер Сити – Эдерсон, Уокер (Аке, 73), Стоунз, Лапорт, Канселу, Гундўған, де Брюйне (Стерлинг, 65), Родри, Силва (Фернандиньо, 79), Фоден, Маҳрез.
Огоҳлантиришлар: Фелипе (24), Льоренте (80), Родри (85), Савич (90+1), Аке (90+1), Маҳрез (90+5), Фоден (90+7), Канселу (90+7).
Четлатиш: Фелипе, 90+1’ (иккинчи с.к).
Биринчи ўйин — 0:1.

Энди 5-5-0 эмас
Манчестердаги биринчи ўйин «Атлетико» футбол фалсафаси ҳақидаги мунозараларни жонлантирганди. Бу янги мавзу эмас: Диего Симеонени кўпчилик у топ-клубга қарши ўйинда ҳаддан ташқари ҳимоявий ўйин кўрсатиб, томошабопликни ўлдириши учун ёқтиришмайди. Лекин унутмаслик керакки, аргентиналик мураббий Мадридда кучли жамоа шакллантирган.

Аммо Манчестерда Симеоне ҳатто ўз стандартларидан ҳам ошиб тушди. Ўйиннинг катта қисмини «Атлетико» 5-5-0 схемасида ҳимояланиб ўтказди, бу ҳақда Пеп Гвардиола матбуот анжуманида ҳам алоҳида қайд этди. «МС» мураббийи ҳеч бўлмаса бир гол уриб олишганидан хурсанд эканини айтди.

Шубҳасиз, «Сити» — сайёранинг энг кучли жамоаларидан бири ва бу жамоага қарши очиқ футбол намойиш этиш қийин. Аммо «Атлетико» ўшанда умуман гол уришга уринмади — УЕФА расмий статистикасига кўра, 90 дақиқа давомида «матрасчилар» дарвоза томон бирор марта зарба беришмаган. Бунақаси Симеоненинг клуб бошқарувидаги эрасида илк бор рўй бериши эди.

Юқори прессинг, аммо фойдасиз
Гвардиола сафарда «Атлетико»дан тажовузкор ўйин кутгани аниқ. Қолаверса, 1/8 финалда испанлар ўз майдонида «МЮ»га қарши ҳужумкор ўйин намойиш этганди. Симеоне чиндан ҳам дадилроқ ўйин кўрсатди — ҳеч бўлмаганда, ҳимояланиш вақтида унинг жамоаси 5-4-1 эмас, 5-3-2 тактикасида жойлашди.

«Атлетико» олдинроқда ва интенсив прессинг уюштирди. Англияда мадридликлар бутун жамоа бўйлаб ортда жойлашган ва «Сити» футболчиларини майдоннинг иккинчи қисмида қарши олишга интилмаган бўлса, энди Жоау Фелиш рақибга анча олдинроқда босим ўтказди. Аммо бу етарли эмасди: Ренан Лоди, Льоренте ва айниқса Гризманн ҳам прессингда иштирок этишди, аммо буни фақат «Атлетико» ўлчовларида агрессив дейиш мумкин эди. «Сити» АПЛ ўйинларининг ярмидан ортиғида бундан кучлироқ ва олдинроқдаги прессингга дуч келади.

Мезбонлар ҳимояда ихчам жойлашувни сақлаб қолишди, «МС» эса бундай ҳимояни ёриб ўтишга ортиқча уринмади — биринчидан, меҳмонларни ҳисоб қониқтирарди, иккинчидан, улар уч кун олдин «Ливерпуль»га қарши жиддий ўйин ўтказишган ва уч кундан кейин ҳам шу жамоага қарши Англия Кубоги финали ўтказилади.

Гвардиола ҳам «Ваньда Метрополитано»га сафар ўйинига тайёргарлик кўрганди. Биринчи бўлимда «Сити» барибир ҳужумкор ўйнади ва гол уришга ҳам яқин келди, аммо Гундўған Уокер бошлаган ҳужумни дарвоза устунини пойлаш билан якунлади. Англияликлар ҳам ҳимояда рақибга деярли имкон беришмади, фақат 35-дақиқада барибир мезбонларда имконият бўлди: Кондогбия узоқ масофадан зарба йўллади. Бу «Атлетико»нинг ушбу қарама-қаршиликдаги илк зарбаси эди.

Диегонинг қайта қуриши
Мадрид жамоасини пассивлик учун танқид қилиш мумкин, аммо жамоа ўзининг биринчи галдаги мақсадига эришди — ўйин охирига қадар интрига сақланиб қолди ва «Атлетико»га ўйинни овертаймларга ўтказиш учун битта гол уриш кифоя эди.

90-дақиқа яқинлашган сари Симеоне ўйинни ўз дарвозаси атрофидан узоқлаштира бошлади. «Атлетико» иккинчи бўлим бошидаёқ очила бошлаган, мезбонлар прессинг тузилмасини ўзгартиришганди: энди Фелишга бу борада Гризманн фаол ёрдам бера бошлади ва қанот футболчилари узатмаларни олдинроқда тўсишга уринишди. «Сити» чиндан ҳам босимдан чиқиб кетишда қийинчиликка дуч кела бошлади ва Гвардиола қатъий чоралар кўришга мажбур бўлди: Эдерсон тўпни ҳимоячиларга узатиб беришни бас қилди — узоқ масофага тепишга ўтди.

«Сити» футболчилари ҳам тез-тез узун узатмаларга мурожаат қила бошлашди — бу Симеоненинг ўзгартиришларига реакция эди. Карраско, Де Паул ва Корреа майдонга чиққач, «Атлетико» фаол ҳужум қилишга ўтди. Майдонда Суарес пайдо бўлгач эса,  «МС»нинг вазияти хавотирли тус олди.

Финишдаги жанжал
Иккинчи бўлимда Эдерсон дарвозаси олдида вазиятлар етарлича бўлди — бундай вазиятлар олдинги учта бўлимдагидан кўра кўпроқ бўлди. 46-дақиқадан 82-дақиқагача «Атлетико» зарбалар бўйича катта устунликка эга бўлди — 7:0. Фантастик статистика.

Асосий вақт тугаётганида икки томоннинг ҳам асаблари чарчади — майдон бурчагида ҳақиқий муштлашув юзага келди, бу можаро Фелипенинг четлатилиши билан якунланди.

Бу вазиятда Фелипе эпизод якунланганидан кейин, майдон ташқарисида Фоденнинг оёқларига орқадан тепди. Шундан кейин шоу бошланди, «Атлетико» футболчилари рақиб футболчисини симуляцияда айблашди.

Ҳакам барча футболчиларга эътибор қаратишга улгурмади ва катта эҳтимол билан Савич фақат сариқ карточка билан қутулиб қолди. У ерда ётган Фоденни судраб ўрнидан турғизишга ҳаракат қилди, такрорий видеода эса Фелипе чиндан ҳам англиялик футболчининг оёғига тепгани яққол кўриниб турганди.

Кўп ўтмай Савич Грилишнинг сочидан ушлаб торта бошлади ва рақиб куч билан унинг қўлини силтаб ташламагунча қўйиб юбормади.

Ҳакам Фелипега иккинчи сариқ карточкани кўрсатди (ўйиндан ташқаридаги эпизодда қасддан қўполлик учун тўғридан тўғри қизил кўрсатиш ҳам мумкин эди). У эса майдонни тарк этишни истамай, ўзининг ҳақлигини исботлашга беҳуда уринди.

Жанжал ўйин якунлангач, трибуналар остидаги йўлакда ҳам давом этган, кузатув камераларида «Атлетико»нинг бошқа бир ҳимоячиси Врсалько рақиб футболчилари томон буюм улоқтиргани ва ҳатто туфлагани акс этган.

Бу можаро «Атлетико»га салбий таъсир кўрсатди — жамоа ўйинни базўр охирига етказиб қўйди. Мадридликлар якуний штурмни қила олишмади, «Сити» футболчилари эса вақт чўзишга киришди. Бу муносиб қадамдек эди — мадридликлар ҳам «МЮ»га қарши ўйин охирида шундай йўл тутишганди, умуман олганда, бундай тактикани тез-тез қўллаб туришади. Симеонега бу ёқмади, аммо ҳеч нарса қила олмасди. Аргентиналик мутахассис Гвардиолани асабийлаштира олди, аммо кейинги босқичга барибир «Сити» йўл оладиган бўлди.

Яримфиналда Пепни Мадридга қарши янги жанг кутмоқда — «Реал»га қарши.

Клопп етакчиларга дам бериб натижага эришди

Ливерпуль — Бенфика 3:3
Голлар: Конате (21), Фирмино (55, 65) — Рамуш (32), Яремчук (73), Нуньес (81).
Ливерпуль – Алиссон, Гомес, Матип, Конате, Цимикас, Милнер (Алькантара, 58), Ҳендерсон (Фабиньо, 58), Кейта, Фирмино (Ориги, 90+1), Жота (Салоҳ, 57), Диас (Мане, 66). 
Бенфика – Влаходимос, Жилберто (Диаш, 90+1), Вертонген, Отаменди, Гримальдо, Таарабт (Жоау Мариу, 66), Диогу Гонсалвеш (Яремчук, 46), Вайгль, Эвертон (Алмейда, 90+1), Нуньес, Гонсалу Рамуш (Паулу Бернарду, 78).
Биринчи ўйин — 3:1.

Куннинг иккинчи ўйинида Юрген Клопп жамоаси ўз уйида «Бенфика» билан 3:3 ҳисобида дуранг ўйнади. Германиялик мутахассис «Сити»га қарши ўйинга куч тежаш учун Арнолд, Робертсон, Салоҳ ва Манени захира ўриндиғида қолдирди.

Бу ўйинда ҳам ҳисобни бўйдор ҳимоячи Конате очди. Фирмино эса ўзига берилган имкониятдан фойдаланиб, эгизак голлар урди.

Сафардаги биринчи ўйинда инглизлар 3:1 ҳисобида ғалаба қозонишганди ва меҳмонларнинг учта голи етарли бўлмади. Шу тариқа, «Ливерпуль» яримфиналга чиқди ва бу босқичда «Вильярреал»га қарши ўйинлар ўтказади.

Яримфинал ўйинлари 26-27 апрель ва 3-4 май кунлари бўлиб ўтади.