Лиссабон масофадан ишлайдиганлар учун энг яхши шаҳар деб топилди

Лиссабон масофадан ишлайдиган топ-менежерлар ва ходимлар учун энг жозибадор шаҳарлар рейтингида биринчи ўринни эгаллади. Рейтинг Savills кўчмас мулк брокери тадқиқотлари асосида тузилди. 

Португалия пойтахти «рақамли кўчманчилар»ни илиқ иқлими, арзон нархлар ва тезкор интернет билан ўзига жалб қилади, дея фикр билдирган компания таҳлилчилари. 

Шу билан бирга, хорижликлар Лиссабонда яшаш учун маҳаллий аҳолига нисбатан икки баравар кўпроқ тўлашга тайёр, деб ёзади Bloomberg Португалия миллий статистика институти маълумотларига асосланиб. 

Маълумотларга кўра, ўтган йилнинг октябридан декабрига қадар хорижликлар Лиссабондаги хонадонларнинг ҳар бир квадрат метри учун ўртача 4283 евро тўлаган, маҳаллий аҳоли эса 1858 евро тўлаган. 

Ўша давр мобайнида шаҳарда кўчмас мулк нархи 11,4 фоизга ошган. 

Рейтингда иккинчи ўринга АҚШнинг Майами шаҳри жойлашди. Қайд этилишича, бу шаҳар солиқ имтиёзлари, паст фоиз ставкалари ва масофадан ишлашга нисбатан қулай сиёсат туфайли ходимларни жалб этмоқда. Рейтингга шунингдек, Дубай, Барбадос, Барселона ва Дубровник шаҳарлари киритилган.