Швейцария «Еврохим»га қарши санкцияларни бекор қилгани учун танқидга учради

Россиялик тадбиркор Андрей Мелниченко бош қароргоҳи Швейцариянинг Цуг шаҳрида жойлашган «Еврохим» компаниясини оддий ҳийла ёрдамида санкциялар остидан олиб чиқди. Мелниченконинг ҳийласини текширган Tages-Anzeiger газетаси 22 май, якшанба куни ёзишича, «Еврохим»га қарши санкцияларнинг бекор қилинишини амалда маъқуллаган Швейцариянинг иқтисодий ишлар бўйича давлат котибияти (SECO) мамлакатнинг етакчи сиёсий кучлари томонидан кескин танқидга учради. 

9 март куни Европа иттифоқи Россия ва Беларусга қарши тўртинчи санкциялар пакети доирасида 14 нафар тадбиркорга нисбатан чеклов чораларини жорий қилди, улардан бири «СУЭК» кўмир компанияси ва ўғит ишлаб чиқарувчи «Еврохим» асосчиси Андрей Мелниченкодир. «Мелниченко Россия ҳукумати билан яқин алоқада бўлган россиялик тадбиркорларнинг энг нуфузли доирасига мансуб», — дейилади тушунтириш хатида. Санкциялар остида қолган тадбиркорларнинг Европа иттифоқига кириши тақиқланди ва уларнинг активлари блокланди. Орадан бир ҳафта ўтиб, Швейцария Мелниченкога қарши санкциялар киритди. 

Журналистларнинг аниқлашича, бу даврда Мелниченко «Еврохим» директорлар кенгашини тарк этиб, компанияни рафиқаси Александрага топширган. Швейцариянинг яна бир нашри - Handelszeitung олигарх адвокатларининг жавобини келтирди, унга кўра «Александра Мелниченко Кипрдаги трастнинг ягона бенефициари ҳисобланади ва шунга мос равишда «Еврохим» акцияларининг 90 фоизига эгалик қилади». Ушбу оддий қарор SECO’га компания ҳисобрақамларини очиб қўйишга имкон берди. Tages-Anzeiger сўровига кўра, идора «Еврохим» санкцияга тушган шахсга тегишли эканлиги ёки назорати остида эканлиги ҳақида ҳақиқий, ишончли далиллар йўқлигини тасдиқлашдан бахтли» эканини билдирган.

17 май куни Андрей Мелниченко ўзига нисбатан қўйилган санкциялар юзасидан Европа иттифоқи умумий судига шикоят қилгани маълум бўлди. Тадбиркорнинг манфаатларини ҳимоя қилувчи адвокатлар даъво аризаси берилганини тасдиқлади. «Андрей Мелниченко ўз тақдирини Европа иттифоқи умумий суди судьяларига ишониб топширади ва Европа суд тизими ижро ҳокимиятининг хатоларини текширади, деб ишонади», — деди тадбиркор вакиллари Forbes нашрига.

Хусусан, чеклов чоралари доирасида 12 март куни Италия молия гвардияси Триеста портида Мелниченконинг Sailing Yacht A яхтасини хатловга олди. Узунлиги 150 метр ва сув сиғими 13 минг тоннага яқин бўлган кема дунёдаги энг катта елканли яхта ҳисобланади. У Германияда, Nobiskrug компаниясининг Кил верфида қурилган ва тахминан 500 миллион еврога баҳоланган. 

Мелниченконинг ўзи унга нисбатан қўлланилган санкцияларни «абсурд ва асоссиз» деб атади. 14 март куни у Reuters агентлигига «қардош халқлар ўртасидаги зиддият»ни тўхтатиш кераклигини айтди. «Миллатим рус, келиб чиқишим беларус ва қоним украин сифатида қардош халқлар қандай курашаётгани ва ҳалок бўлаётганини кўриб, қаттиқ изтироб ва ишончсизликни ҳис қиляпман», — дея унинг сўзларини келтирган тадбиркор вакили. 
 
«Еврохим» (EuroChem Group) азот, фосфор ва калийли ўғитлар ишлаб чиқарувчи дунёдаги бешта йирик компаниялардан биридир. Компаниянинг фаолияти тоғ-кон саноати, шунингдек, ўғитлар ишлаб чиқариш, логистика ва тарқатиш хизматини ўз ичига олади. Компаниянинг асосий ишлаб чиқариш активлари Россия, Бельгия, Литва ва Хитойда жойлашган. Компанияда 26 мингдан ортиқ киши ишлайди.