Қашқадарёда пенсия ва нафақа пулларини талон-торож қилган банк ходимлари аниқланди

Қашқадарё вилоятининг Шаҳрисабз туманида пенсия ва нафақа пулларини талон-торож қилган банк ходимлари аниқланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар бермоқда.

Фото: Kun.uz

Маълум қилинишича, Бош прокуратура ҳузуридаги департаментнинг Шаҳрисабз туман бўлими томонидан АТ “Халқ банк” Шаҳрисабз филиалининг мурожаатига асосан терговга қадар текширув ўтказилган.

Унда, филиалининг 4-сонли сайёр касса бухгалтер назоратчиси С.И. ва кассири Н.Р. ўзаро тил бириктириб, тумандаги 150 нафар фуқарога жорий йилнинг март, апрель ва май ойлари учун ажратилган 100,5 млн сўм пенсия ва нафақа пулларини фуқароларга берилишини таъминламагани аниқланган.

Қайд этилишича, юқоридаги шахслар пенсия ва нафақа пулларини ўзларининг шахсий эҳтиёжлари учун сарфлаб талон-торож қилган. Текширув давомида етказилган зарарнинг тўлиқ қопланиши таъминланган.

Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилган.

Департамент маълумотига кўра, ҳозирги вақтда тергов ҳаракатлари ўтказилмоқда.