Стэнли кубогининг россиялик совриндорларига кубокни уйга олиб бориши тақиқланади

НҲЛ ғолибларининг бу йилги анъанавий Стэнли кубоги совриндорлари ватанига сафари Украинага бостириб кириши сабабли Россияни четлаб ўтади.

Фото: sovsport

Агар россиялик ёки беларуслик ўйинчи ўз жамоаси билан биргаликда АҚШ Миллий ҳоккей лигаси (НҲЛ) плей-оффида ғолиб чиқса ва Стэнли кубоги соҳибига айланса, лига унга кубок билан Россия ёки Беларусга боришга рухсат бермайди. Бу ҳақда НҲЛ комиссари ўринбосари Билл Дэйли 15 июнь, чоршанба куни маълум қилди.

Лига раҳбарияти финалга чиққан «Колорадо Эвеланш» ва «Тампа-Бэй Лайтнинг» жамоаларига ўз қарори ҳақида хабар берган, деб ёзади AP. Ҳар қандай ҳолатда ҳам россиялик ҳоккейчи кубок соҳибига айланади, дея қайд этади агентлик. «Колорадо» сафида россиялик ҳужумчи Валерий Ничушкин, «Тампа» сафида эса дарвозабон Андрей Василевский, ҳимоячи Михаил Сергачев ва ҳужумчи Никита Кучеров ўйнайди.

Анъанага кўра, Стэнли кубоги жамоаси ўйинчилари кубокни бир кунга уйига олиб кетиши ва ўз шаҳарларига олиб бориши мумкин. «Келажакда пандемия туфайли қилганимиз каби, кубок турнесини ташкил қилишимиз мумкин, аммо Россияда бу ёзда бўлмайди», деди Дэйли. Лига Россиянинг Украинага бостириб кириши сабабли бундай қарорга келди, дея тушунтирди у.