Эммануэл Макрон Москвада Путин билан учрашиши мумкинлигини истисно этмади 

Франция президенти Эммануэл Макрон Россия президенти Владимир Путин билан муайян шартлар остида Москвада учрашиши мумкинлигини истисно этмади. Бундай ташриф фақат Украина етакчиси Володимир Зеленскийга нисбатан «тўлиқ шаффофлик» шарти билан амалга оширилиши мумкин, дея Макрондан иқтибос келтирган Dpa агентлиги. 

«Ўйлашимча, бугун Россияга сафар қилиш учун зарур шартлар, яъни президент Путиннинг ҳаракатлари бўлиши керак, мен у ерга шунчаки бормайман», деди Макрон Киевга ташрифи чоғида TF1 телеканалига берган интервьюсида. Макроннинг сўзларига кўра, у Путин билан гуманитар масалаларни, ҳарбий асирларни ҳимоя қилиш ёки озиқ-овқат хавфсизлигини муҳокама қилишга тайёр. «Шунинг учун мен ҳеч нарсани истисно қилмаяпман, лекин буни Украина президентига нисбатан очиқ қиламан. Бу мантиқан тўғри бўлади», деди Макрон. 

«Биз бошдан кечираётган глобал озиқ-овқат инқирози Россиянинг Украинага қарши олиб бораётган урушининг бевосита натижасидир. Биз Россияни БМТга Украина портларини блокададан чиқариш орқали дон экспортини ташкил қилишга рухсат беришга чақирамиз», деб ёзди Макрон кейинроқ. 

Украинадан Россияга эҳтимолий ҳудудий ён босиш ҳақида сўралганда, Макрон буни фақат Украинанинг ўзи ҳал қилиши кераклигини айтди. «Менимча, бугунги кунда қадриятларимиз, халқаро ҳуқуқ ва Украинани ҳимоя қилиш бизнинг бурчимиздир. Лекин украиналиклар учун бу урушни тугатиш шартларини ҳал қилиш бизнинг вазифамиз эмас», - деди Франция президенти. 

«Қайсидир нуқтада, бу ё ҳарбий ғалаба билан, ёки очиқ музокаралар билан якунланиши керак», - деди у. Эҳтимолий ён босиш ёки муросага бориш бўйича барча қарорларни фақат мамлакат расмийлари қабул қилиши мумкин, деди Макрон. 

«Франция биринчи кундан бери Украина билан бирга. Биз ҳеч қандай икки хил позицияга эга эмасмиз», - дея журналистларнинг Украинада қаттиқ танқид қилинган - «Путинни камситмаслик» ҳақидаги аввалги чақириғи ҳақидаги саволига Франция раҳбари жавоб берди. 

Эммануэл Макрон Германия канцлери Олаф Шольц, Италия бош вазири Марио Драги ва Руминия президенти Клаус Йоханнис билан биргаликда сафари чоғида Украинанинг Европа иттифоқига номзод мақоми учун аризаси маъқулланишини ҳам бир овоздан қўллаб-қувватлади.