«АрМИ-2022» халқаро армия ўйинларида Ўзбекистон 5 та йўналишга мезбонлик қилади

«АрМИ-2022» халқаро армия ўйинлари жорий йилнинг 13 августидан 27 августига қадар дунёнинг 12 та давлати ҳудудида ўтказилади.

Фото: Мудофаа вазирлиги ахборот хизмати

Ўзбекистон Мудофаа вазирлиги бу сафар мусобақанинг 20 та йўналишида иштирок этади. 34 та йўналишни қамраб олган мусобақаларда 37 та давлатдан 275 та жамоа ўзаро беллашади.

Мудофаа вазирлиги ахборот хизмати раҳбари Отабек Йўлдошевнинг маълум қилишича, мамлакат ҳудудида илк бор мусобақалар 5 та йўналиши бўлиб ўтади.

Жиззахдаги «Фориш» полигонида «Дала ошхонаси» ва «Қуролсоз уста» мусобақалари, Самарқанддаги «Сазаган» полигонида «Хавфсиз муҳит», Шарқий ҳарбий округда «Йўл патрули» ва Чирчиқ олий танк қўмондонлик-муҳандислик билим юртида «Содиқ дўст» мусобақаси ўтказилади.

Мудофаа вазирлиги жамоалари Россия ҳудудида ўтказиладиган «Эльбрус ҳалқаси», «Автозирхли танк-техника устаси», «Қўшинлар разведкаси аълочиси», «Танк биатлони», «Ҳарбий-тиббий эстафета», «Ҳарбий ралли», «Муҳандис формуласи» мусобақаларида, Мўғулистонда «Отлиқ марафон», Беларусда «Ишончли қабул» ва «Қутб юлдузи», Қозоғистонда «Армия тактик ўқчиси» ва «Меридиан», Венесуэлада «Мерганлик марраси», Жазоирда «Десант взводи» ҳамда Эронда «Профессионал мерган» йўналишларида иштирок этади.