Ҳоланд АПЛда голлари ҳисобини очди: у ҳақда билиш керак бўлган ҳамма нарса

Одатда футболчилар қайсидир клуб билан шартнома имзоласалар, одоб нуқтайи назаридан ёшлигидан унинг ишқибози бўлганини айтишади. Эрлинг «Сити» билан шартнома имзолаганида ҳам бу гапларни айтди, аммо бу айни ҳақиқат эди.

«Мен Англияда туғилганман. Мен бутун умр «Сити»га мухлислик қилганман. Мен клуб ҳақида кўп нарсани биламан. Шартномани имзолаш қарорим иккита нарсага боғлиқ эди: бу ерда ўзимни уйдагидек ҳис қиламан ва «Сити»да ўзимни ривожлантириб, имкониятимдан максимал даражада фойдалана олишимга ишонаман».

У спортчилар оиласида улғайди

Ҳоланднинг нафақат отаси, балки онаси ҳам спортчи бўлган, ҳа у чинакам спортчилар оиласида улғайди. Онаси Грю Марита Брёут гептатлон бўйича Норвегия чемпиони эди.

Жаҳон рекордчиси

Қизиғи шундаки, Эрлинг ёшлигида футболда эмас, балки енгил ателтикада ном қозонишга эришди. У мураббий Андре Остгард қўл остида спортнинг ушбу тури билан шуғулланган.

5 яшарлигида болалар ўртасидаги мусобақада қатнашиб, турган жойда узоққа сакраш бўйича жаҳон рекордини ўрнатган - 1,63 метр!

У бошқа спорт турини танлашига сал қолганди

Отасининг сўзларига кўра, Эрлинг нафақат енгил атлетикада, балки бошқа спорт турларида ҳам ўзини кўрсата олган.

«Футболдан олдин бошқа спорт турларига қизиқар эди. Биз уни енгил атлетикага олиб бордик. Эрлинг 14 ёшигача ҳандбол, енгил атлетика ва чанғи спорти билан шуғулланди. Норвегия миллий жамоаси бош мураббийи унинг ҳандбол билан шуғулланишини хоҳлаганди», - дейди у.

Яхшиямки, у футболни танлади

Катта футболга қадам босиши учун Ҳоландга кўп вақт керак бўлмади.

16 ёшли Эрлинг «Брюн» клубининг ўсмирлар жамоаси таркибида 14 та ўйинда 18 та гол ургач, ўз ёш тоифасидаги Норвегия миллий жамоасидан чақирув олди.

Бир ўйинда тўққизта гол?!

Ҳоланд биринчи марта дунё нашрлари сарлавҳасига 2019 йилда, 20 ёшгача бўлган футболчилар ўртасидаги жаҳон чемпионатида Ҳондурасни «қиличдан ўтказганида» тушди.

Норвегия гуруҳдаги сўнгги ўйинда 12:0 ҳисобида ғалаба қозонди, Эрлинг эса 9 та гол урди.

Қизиғи шундаки, Норвегия миллий жамоаси ўшанда гуруҳдан чиқа олмайди. Эрлинг эса барча голларини фақат битта ўйинда уриб, якунда жаҳон чемпионатиниг энг яхши тўпурари сифатида «Олтин бутса»ни қўлга киритади.

Чемпионлар лигаси рекордчиси

Норвегияда «Брюн» ва «Мольде» клубларида ажойиб таассурот қолдирганидан сўнг, Ҳоланд 2019 йил январ ойида Австриянинг «РБ Зальцбург» клубига кўчиб ўтди.

Чемпионлар Лигасидаги илк ўйинида «Генк» (4:2) дарвозасига учта тўп йўллади. Натижада ушбу мусобақадаги дебют ўйинидаёқ ҳет-трик қайд этган ўнинчи футболчи бўлди.

Ҳоланд бу билан тўхтатмади ва Чемпионлар Лигасидаги дастлабки 5 та ўйиннинг барчасида рақиблар даврозасини ишғол қилди. Бундай натижага тарихда фақат 4 футболчи эришган холос.

Уйқудаги ғалати одатлари

Ҳоланд «РБ Зальцбург» таркибида ҳет-трикларни қалаштириб ташлади. Анъанага кўра, футболчилар ҳет-трик қайд этилган ўйинлардаги тўпни эсдалик учун олиб кетишади. Эрлингда улардан анча-мунчаси тўпланиб қолган.

«Уларни ётоқхонамга қўяман, бу яхши ухлашимга сабаб бўлади», дейди Ҳоланд. «Уларга ҳар куни тикилиб ётаман. Гол уриш мароқли. «РБ Зальцбург»дан 5 та тўпим бор. Улар менинг дўстларим».

Бу Ҳоланд тан олган ягона ғалати одат эмас. 2021 йилдан бошлаб, у Чемпионлар Лигаси мадҳиясидан будильник қўнғироғи сифатида фойдаланишни бошлаган.

«Бу менинг қўнғироғим. Ҳар куни ушбу мадҳия садолари остида уйғонаман, ундан безиб кетмаганман. Шу сабабли, куним ҳар доим қувноқ бошланади».

Уни илҳомлантирган футболчи

Пеле, Марадона, Месси ёки Роналду эмас. Ёшлигида у испаниялик ҳужумчи Мигел Перес Куэста ёки «Мичу» ишқибози бўлган. Унчалик машҳур бўлмаган футболчи 2012-2015 йилларда «Суонси» таркибида 52 та ўйинда майдонга тушиб, 20 та гол урганди.

Дортмунддаги ақлбовар қилмас дебюти

«РБ Зальцбург» билан Европани лол қолдиргач, Ҳоланд кўплаб топ-клублар таклифини рад этиб, 2020 йил январида Дортмунднинг «Боруссия» клубига ўтди.

Бутун дунё нигоҳи унинг дебютига қаратилди, аммо соғлиғидаги муаммолар туфайли ўйинни захира ўриндиғида бошлади. «Аугсбург»га қарши ўйинда жамоасининг 1:3 ҳисобида ютқазаётганини томоша қилиб ўтирди. Сўнгра майдонга тушди. Кейин нима воқеа юз берганини эртакка ўхшатиш мумкин: 23 дақиқа ичида ҳет-трик!

Энг ноёб мукофоти

Ҳоланд 2020 йил қишда Бундеслигада дебют қилиб, январ ойида 2 та ўйинда жами 59 дақиқа ўйнади. «Аугсбург» ва «Кёльн»га қарши ўйинларда захирадан майдонга туширилди ва 5 та гол урди. Якунда «ойнинг энг яхши футболчиси» совринини қўлга киритди.

Унинг рақамлари ҳайратга солади

Ҳоланднинг Дортмунддаги фаолияти яшин тезлигида бошланди. Бу эса кейинги ўйинлари учун тезланишни берган бўлса ажаб эмас. У мавсумнинг биринчи ярмини 18 ўйинда урилган 16 та гол билан якунлади. Иккинчи мавсумида 27 марта, кейингисида 22 марта дарвозабонларни доғда қолдирди.

Унинг «Сити»га ўтиши тасдиқланганида, Бундеслига рекордлари сони кўп эди:

- 25 та гол маррасига энг тез етиб олган футболчи;

- 50 та гол маррасига энг тез етиб олган футболчи;

- 50 та гол урган энг яхши ёш футболчи;

- «Боруссия» таркибида Бундеслига, Чемпионлар Лигаси ва Германия Кубогидаги дебютида гол урган биринчи футболчи;

- Бир ўйинда тўртта гол урган энг ёш футболчи;

- Дастлабки икки ўйинда бешта гол урган биринчи футболчи;

- Майдонда ўтказилган дақиқалар ва голлар нисбатига кўра Бундеслига тарихидаги энг яхши футболчи.