ФҚБ Трампнинг Флоридадаги уйида тинтув ўтказди

АҚШ собиқ президенти Доналд Трамп Федерал қидирув бюроси (ФҚБ) унинг Флоридадаги Мар-а-Лаго қароргоҳида тинтув ўтказганини маълум қилди. «Бизнинг миллатимиз учун қоронғи вақтлар келди. Менинг гўзал уйим, Флоридадаги Палм-Бичда жойлашган Мар-а-Лаго ҳозирда ФҚБ ходимларининг катта гуруҳи томонидан қамалда», дейилади Трампнинг 8 август, душанба куни ўз Truth Social ижтимоий тармоғида эълон қилган баёнотида.

Трампнинг сўзларига кўра, тинтувлар чоғида ФҚБ агентлари унинг сейфини бузишган. «Бу ҳуқуқ-тартибот органларининг нотўғри хатти-ҳаракати, суд тизимини қуролга айлантириш ва 2024 йилда президентликка номзод бўлишимни истамайдиган ўта сўл демократларнинг ҳужуми», деди у. 

ФҚБ собиқ президентнинг уйида тинтувлар ўтказилганми, деган саволга жавоб беришдан бош тортди ва тинтувнинг эҳтимолий сабабларига изоҳ бермади. Бироқ, Америка ОАВ терговга яқин манбаларга таяниб, суд томонидан рухсат этилган тинтувга Трамп Оқ уйни тарк этганда ўзи билан олиб кетган махфий ҳужжатлар сабаб бўлиши мумкинлигини билдирди. У уларни Миллий архивга топшириши керак эди.

Февраль ойида Миллий архив Трампнинг Мар-а-Лагодаги қароргоҳидан 15 қути ҳужжатларни мусодара қилганини тасдиқлади. Улар орасида Трампнинг Шимолий Корея раҳбари Ким Чен Ин билан расмий ёзишмалари, шунингдек, Трампдан аввалги президент Барак Обаманинг Овал кабинетда қолдирган мактуби бор эди. 

Қонунга кўра, президентлик муддати тугаганидан кейин унинг ҳужжатлари Миллий архивга топширилиши керак. Ҳужжатли қутиларнинг қайтарилиши Трампнинг Президентлик ёзувлари тўғрисидаги қонунга амал қилиши бўйича саволлар туғдирди. Шундан сўнг Миллий архив Адлия вазирлигидан собиқ президентнинг хатти-ҳаракатлари юзасидан текширув бошлашни талаб қилди.