Си Жинпинг Хитой ҳарбийларини урушларга тайёргарлик кўришга чақирди

ХХР раиси Си Жинпинг Хитой ҳарбийлари «урушларга тайёргарлик кўришга эътибор қаратишлари» кераклигини айтди, деб хабар берди Синҳуа агентлиги.

Хабарда айтилишича, у миллий мудофаа ва ҳарбий ислоҳотларга бағишланган анжуманда ана шундай фикр билдирди.

«Ислоҳотлар тажрибасини умумлаштириш ва қўллаш, янги вазиятларни назорат қилиш, вазифалар талабини тушуниш, урушларга тайёргарлик кўришга эътибор қаратиш керак»,— деди Жинпинг.

Анжуманда Си Хитой қуролли кучларини кучайтириш бўйича ислоҳотлар ўтказилганини таъкидлади.

Хитой армиясини ислоҳ қилиш 2015 йилда бошланган. Ўшандан буён стратегик аҳамиятга эга ракета қўшинлари ташкил этилди. Бундан ташқари, ҳарбий-денгиз флоти иккита авиаташувчи ва кўплаб кемаларга эга бўлди.