Kun.uz ҳолатни ўрганиш мақсадида Пахтачи туманида бўлди.
Гўрўғли маҳалласида яшовчи Шерали Эгамбердиев чорвачилик ортидан рўзғор тебратади. У биз билан суҳбатда 2021 йилнинг 7 декабр куни қўрасидан 20 та қўй ўғирлаб кетилганини маълум қилди.
Чўпон эрта туриб қўра атрофида бегона оёқ изларини кўрган. Ҳодиса жойига етиб келган профилактика инспекторлари туман шароитида экспертиза қилиш ёки из олувчи итлари йўқлиги айтган. Шу сабабли излар устига плёнка ташлаб қўйишни тайинлаган. Воқеадан уч кун ўтиб Самарқанд вилоятидан мутахассислар етиб борганида эса, излардан асар ҳам қолмаган.
Шерали аканинг турмуш ўртоғи Лобар Қосимова саккиз-тўққиз ой давомида мурожаат қилмаган ташкилот қолмади ҳисоб. Лобар опанинг айтишича, вилоят ҳокимининг сайёр қабулига мурожаат қилиш учун борганида, у Пахтачи туман ички ишлар бўлими томонидан тўхтатиб қолинган. Ҳатто унинг қўлида Пахтачи туман ИИБ бошлиғи Мухтор Аҳмедовнинг жиноятни 15 куни ичида очиб бераман, деб ёзилган тилхати ҳам бор.
Бироқ натижа ўша-ўша!
Дарвоқе, бу биргина ҳолат эмас. Ушбу хонадондан чамаси икки километр наридаги қўрадан ҳам 2021 йилнинг март ойида 26 та қўй ўғирланган. Чорва эгаси Сабоҳат Облоқулова мурожаат қилинганидан бир ой ўтиб, ИИБ ходимлари ўрганиш учун келганини айтмоқда.
Сабоҳат опа гумондор ҳақида ички ишлар идораларига маълум қилган. Гумон қилишига етарлича асослари ҳам борлигини айтмоқда. Қизиғи, икки оила ҳам бир одамдан гумон қилмоқда. Чунки унинг оёқ изларини эртаси куни қўра атрофида кўришган, қолаверса, бир кун аввал уйлари атрофида ҳам уни кўришган. Ҳудуддаги уйларнинг жойлашувига эътибор қиладиган бўлсак, бегона киши бежизга бировнинг хонадони ёки қўрасига яқинлашмайди. Ялангликда бегонани пайқаш жуда ҳам осон.
