Ёшлар ишлари агентлиги волонтёрлик соҳасидаги махсус ваколатли орган этиб белгиланади

Қонунчилик палатаси Демократик институтлар, нодавлат ташкилотлар ва фуқароларнинг ўзини-ўзи бошқариш органлари қўмитаси томонидан “Волонтёрлик фаолияти тўғрисида”ги қонунга волонтёрлик фаолияти соҳасида давлат бошқарувини такомиллаштиришга қаратилган ўзгартиш ва қўшимчалар киритиш ҳақида”ги қонун лойиҳаси муҳокамасига бағишланган йиғилиш ўтказилди.

Фото: iStock

Қонун лойиҳаси волонтёрлик фаолияти соҳасидаги давлат сиёсатини амалга ошириш бўйича ваколатли давлат органини белгилаш мақсадида ишлаб чиқилган.

Қонун лойиҳаси Ёшлар ишлари агентлигини волонтёрлик фаолияти соҳасидаги махсус ваколатли давлат органи сифатида белгилашни ва унинг ваколатларини ифодалашни назарда тутади. Давлат бошқарув органларининг волонтёрлик фаолияти соҳасидаги ваколатлари белгиланмоқда ҳамда маҳаллий давлат ҳокимияти органлари ушбу соҳадаги ваколатлари такомиллаштирилмоқда.

Ишчи гуруҳ йиғилишида лойиҳадаги маҳаллий ижро этувчи ҳокимият органлари ва бошқа ташкилотларнинг волонтёрлик фаолияти соҳасидаги ишларини мувофиқлаштиришга қаратилган норма атрофлича муҳокама қилиниб, уни такомиллаштириш бўйича тегишли таклифлар берилди.

Қонун лойиҳасини такомиллаштириш ишлари давом этмоқда.