Тадбиркорларга нисбатан янги турдаги жазо чораларини жорий қилишга 3 йиллик мораторий эълон қилиниши кутилмоқда

Ўзбекистон Республикаси Президентининг “Тадбиркорлик субъектларининг ҳуқуқий ҳимоясини янада кучайтириш чора-тадбирлари тўғрисида”ги фармон лойиҳаси ишлаб чиқилди.

Бизнес-омбудсман президентнинг тадбиркорлар билан учрашувда илгари сурган ташаббусларидан келиб чиқиб, фармон лойиҳасини эълон қилди.

Қайд этилишича, 2023 йил 1 январдан бошлаб:

тадбиркорлик субъектларига нисбатан янги турдаги жавобгарлик ва жазо чораларини белгилашга уч йиллик мораторий жорий этилади;
тадбиркорлик фаолиятини амалга ошириш жараёнини мураккаблаштиришни ва тадбиркорлик субъектларига янги мажбуриятлар юклатишни назарда тутадиган норматив-ҳуқуқий ҳужжатлар улар расман эълон қилинган фурсатдан бошлаб, олти ойдан олдин бўлмаган муддатда кучга киритилади;
тадбиркорлик субъектларига мажбуриятлар юклайдиган янги қонунчилик ҳужжатларида назарда тутилган талабларни бажармаганлик учун уларга нисбатан олти ой давомида жавобгарлик чоралари қўллаш тақиқланади.

Шунингдек, Савдо ёки хизмат кўрсатиш қоидаларини бузганлик учун белгиланган жиноий жавобгарлик маъмурий юрисдикцияга ўтказиш орқали бекор қилинади.

Адлия вазирлиги, Бош прокуратура, Тадбиркорларнинг ҳуқуқларини ҳимоя қилиш бўйича вакил ҳамда Савдо-саноат палатасининг тадбиркорлик фаолиятини амалга ошириш билан боғлиқ қонунчилик талабларига риоя этмаганлик учун белгиланган молиявий санкциялар миқдорлари камида 30 фоизга камайтирилади. Хусусан:

молиявий санкциялар суммаси ўн беш кунлик муддатда ихтиёрий равишда тўланганда жарима миқдори белгиланган миқдорга нисбатан икки бараварга камайтирилади;
тадбиркорлик фаолиятини амалга оширишда биринчи марта ҳуқуқбузарликлар содир этган микро ва кичик тадбиркорлик субъектларига молиявий санкция чоралари қўлланмайди ҳамда ҳуқуқбузарликларни аниқлаган тегишли назорат қилувчи органлар томонидан уларни бартараф этишга қаратилган ва ҳуқуқбузарликка йўл қўйилишининг олдини олиш бўйича профилактика тадбирлари ўтказилади, бундан терговга қадар ва жиноят ишлари доирасида аниқланган ҳуқуқбузарликлар учун қўлланадиган жарималар мустасно.

Бундан ташқари, тадбиркорлик фаолиятида назорат органларининг такрорланадиган ва замон талабларига мос келмайдиган 20 дан ортиқ назорат функциялари мақбуллаштирилади.

Тадбиркорлик субъектларига нисбатан савдо қоидаларини бузганлик, турли нарх белгилаганлик, солиқ ҳисоботларини муддатидан кечиктириб топширганлик, ишчи сонини кўрсатмаслик каби ҳолатлар учун белгиланган маъмурий жарималар икки баробарга оширилади.