Лондон: Россия дезертирларни отиш учун «тўсиқ отрядлари» тузяпти

Британия Мудофаа вазирлиги томонидан Twitter’да эълон қилинган кунлик ҳисоботда айтилишича, бундай бўлинмалар ўзларининг чекинаётган аскарларини ҳужумга мажбурлаш учун отиб ташлаш билан таҳдид қиляпти ва бундан аввалги можароларда Россия кучлари томонидан фойдаланилган. 

Маълумотда гап қайси можаролар ҳақида кетаётганига аниқлик киритилмаган. 

Разведка ахборотига кўра, сўнгги пайтларда рус генераллари армиядаги қўмондонлар дезертирларга қарши қурол ишлатишларини, ҳарбийлар эса ўлгунича сафда туриб, ҳимояланишини хоҳлаяпти. 

Дезертирларни отиш тактикаси рус қўшинларининг сифатсизлиги, руҳий ҳолати пастлиги ва интизомсизликдан далолат бериши мумкин, дейилади ҳисоботда. 

3 ноябрь куни Россия оммавий ахборот воситаларида Украинада жанг қилишдан бош тортган сафарбар қилинганлар ҳақида бир нечта хабарлар чоп этилганди - барча ҳолатларда улар дезертирлик учун жиноий жавобгарликка тортилиши билан таҳдид қилинган. 

Gulagu.net лойиҳаси мисол тариқасида Богучари шаҳридаги 91711-сонли ҳарбий қисмнинг 252-мотоўқчилар полкига сафарбар қилинган фуқароларнинг видеомурожаатини келтирди — улардан 39 нафари босиб олинган ҳудудлардаги жанговар ҳаракатларда қатнашишдан бош тортган. 

Улар Россия чегарасигача пиёда борганликларини ва у ерда ҳарбийлардан уларни қисмга қайтаришларини сўрашганини айтишди. Бироқ бунинг ўрнига урушдан бош тортганлар автобусга миндирилиб, Луҳанск вилоятининг босиб олинган ҳудудига қайтарилган.

Шу билан бирга, ASTRA нашри Томск вилоятидан сафарбар қилинганлар ҳақида маълумот берди. Улар, қариндошларининг сўзларига кўра, икки ҳафтадан кўпроқ вақт олдин фронтни тарк этган ва кейин Луҳанск вилояти ўрмонларида яширинган. 

Улар охирги марта 17 октябр куни алоқага чиқишган. Урушдан бош тортганлар Томск вилоятидан Давлат думаси депутати Татяна Соломатинадан ёрдам сўрашган, аммо у гўёки «офицерлар дезертирлар билан ишлашдан бош тортишини» айтган.