Херсондан олиб кетилаётган қариялар, Киевда хавф остида қолган жониворлар. Уруш суратлари

Урушнинг 255-кунидаги асосий маълумотлар:

Эрон ташқи ишлар вазири Россияга ҳарбий дронлар етказиб берилгани фактини илк бор тан олди. Аммо у дронлар урушдан олдин ва катта бўлмаган миқдорда етказиб берилганини айтди. Украина президенти буни ёлғон деб атади ва украин ҳарбийлари кунига ўртача ўнта эронликлар дронини уриб тушираётганини маълум қилди. Бунга қадар Москва ҳам, Теҳрон ҳам август ойида ҳарбий ҳаракатлар майдонида пайдо бўлган дронлар Эрондан Россияга етказиб берилаётганини расман инкор этаётганди.
Россия Херсон яқинида Днепр дарёсидан сузиб ўтиш воситаларини портлатиб юборган. Бу эса дарёда катта ҳажмда ёнилғи-мой моддалари йиғилишига олиб келган, Херсон области ҳарбий маъмурияти бу экологик фалокат таҳдидини юзага келтирганини айтмоқда.
Евгений Пригожин «Кепка Пригожина» телеграм-канали гўёки ўзига тегишли эмаслигини айтди - бу канал шу вақтгача унинг матбуот хизмати орқали ОАВ саволларига жавоб қайтариб келарди. Шундан сўнг унинг матбуот хизмати бўлган «Конкорд» гуруҳи телеграмда очилган янги канал унинг расмий саҳифаси эканини билдирди.
Херсон санъат музейидан маълум қилишларича, Россия томонидан тайинланган маъмурият эвакуация баҳонасида экспонатларни Қримга олиб кетган.
Россияликларнинг июл-сентябр ойларида постсовет ҳудудидаги мамлакатларга ташрифи бўйича сўнгги йиллардаги рекорд кўрсаткичлар қайд этилди.
Аннексия қилинган Мелитополда етти йил муқаддам бузиб ташланган Ленин ҳайкали тикланди.

Қуйида 5 ноябр куни Украинанинг турли ҳудудларида олинган суратлар.

Херсон областида қариялар уйидаги аҳолининг кўчирилиши