Совуқ ҳарорат фонида газ ва электр танқислиги муаммоси давом этаркан, Ўзбекистон Туркманистоннинг “Туркманенерго” корпорациясидан импорт амалиётини суткалик 17-18 млн кВт-соатдан 20-21 млн кВт-соатга оширди.
Бу ҳақда бугун, 9 декабр куни Ўзбекистон Энергетика вазирлиги маълум қилди. Расмий ахборотда импорт қайси санадан бошлаб оширилганига аниқлик киритилмаган.
Вазирликнинг бошқа бир хабарига кўра, Фарғона нефтни қайта ишлаш заводида Аи-80 маркали бензиннинг суткалик ишлаб чиқариш ҳажми 850 тоннадан 1000 тоннага, суюлтирилган газ ишлаб чиқариш ҳажми эса 30 тоннадан 50 тоннага оширилмоқда.
Айни пайтда, “Ўзбекнефтгаз”нинг бензин шохобчалари тармоғи – UNG Petro Тошкентдаги шохобчаларнинг айримларидаги 9 декабр кунги нархлар ҳақида маълумот берди. Унга кўра, пойтахтда Аи-80 бензини 6800 сўмдан 7500 сўмгача, Аи-92 9500 сўмдан 12 500 сўмгача, Аи-95 10 500 сўмдан 14 000 сўмгача чакана нархларда сотилмоқда.
Эслатиб ўтамиз, 7 декабр куни Президент администрацияси раҳбари Сардор Умрзоқов ўтказган йиғилишда газ, электр, кўмир ва мазут импорти бўйича музокараларни фаоллаштириш ҳақида сўз борган эди.
Йиғилишда биржа сотувларига қўйилаётган Аи-80 бензинининг кунлик ҳажми оширилиши, бу маркали бензин импорти ва чакана реализацияси акциз солиғидан вақтинча озод этилиши, биржада Аи-80 бензини савдосига воситачи компанияларнинг иштирок этишига йўл қўйилмаслиги, суюлтирилган газ экспорти тўлиқ тўхтатилиши ҳам маълум қилинганди.
Октябр ойида, президент Шавкат Мирзиёевнинг Туркманистонга ташрифи чоғида йилига 4 млрд кВт-соат электр энергияси сотиб олиш бўйича шартнома имзоланган
