Хавфлилик даражаси юқори бўлган маҳсулотлар мажбурий давлат рўйхатидан ўтказилади

Вазирлар Маҳкамасининг “Маҳсулотларнинг мувофиқлигини баҳолаш тартибларига оид низомларни тасдиқлаш тўғрисида”ги қарори лойиҳаси эълон қилинди.

Ҳукумат қарори лойиҳаси билан:

а) хавфлилик даражаси юқори бўлган маҳсулотларни мажбурий давлат рўйхатидан ўтказиш тартиби тўғрисидаги низом тасдиқланади. Унда қуйидагилар назарда тутилган:

• мажбурий тартибда давлат рўйхатидан ўтказиладиган маҳсулотлар турлари рўйхати;
• давлат рўйхатидан ўтказилган маҳсулотлар давлат реестрини юритиш;
• давлат рўйхатидан ўтказилган маҳсулотларнинг далилий ҳужжатларини шакллантириш ва сақлаш;
• давлат рўйхатига олинганлик тўғрисидаги гувоҳномага ўзгартириш киритиш, уни амал қилишини тўхтатиб туриш ёки тугатиш тартиби;

б) маҳсулотларни сертификатлаштириш тартиби тўғрисидаги низом тасдиқланади. Унда қуйидагилар назарда тутилган:

• мажбурий тартибда сертификатланадиган маҳсулотлар турлари рўйхати;
• маҳсулотларни интеллектуал мулк объектларига бўлган ҳуқуқларни ўрганиш ва текшириш;
• сертификатлаштиришни амалга ошириш тартиби;
• маҳсулотларни сертификатлаштириш схемалари қўлланиши;
• сертификатлаштирилган маҳсулотларни даврий баҳолаш;
• мувофиқлик сертификатига ўзгартириш киритиш тартиби;

в) хавфлилик даражаси юқори бўлмаган маҳсулотларнинг мувофиқлигини декларациялаш йўли билан тасдиқлаш тартиби тўғрисидаги низом тасдиқланади. Унда қуйидагилар назарда тутилган:

• хавфлилик даражаси юқори бўлмаган мажбурий мувофиқлиги декларацияланадиган маҳсулотлар рўйхати;
• мувофиқликни декларациялаш схемалари;
• мувофиқликни декларациялаш ҳужжатларни шакллантириш ва уни рўйхатга олиш;
• мувофиқлик декларациясини рўйхатга олишга асос бўлган далилий ҳужжатларни шакллантириш ва сақлаш;

г) хавфлилик даражаси юқори бўлмаган маҳсулотларнинг мувофиқлигини маълум қилиш йўли билан тасдиқлаш тартиби тўғрисидаги низом тасдиқланади. Унда қуйидагилар назарда тутилган:

• хавфлилик даражаси юқори бўлмаган мажбурий мувофиқлиги маълум қилинадиган маҳсулотлар рўйхати;
• мувофиқлик хабарномасини рўйхатга олиш, унинг амал қилишини тўхтатиб туриш ёки тугатиш;

д) маҳсулотларни техник жиҳатдан тартибга солиш соҳасидаги норматив ҳужжатлар ва бошқа норматив-ҳуқуқий ҳужжатлар талабларига номувофиқлигини аниқлаш, уларнинг рўйхатини юритиш, эркин муомаладан чиқариш ва йўқ қилиш тартиби тўғрисидаги низом тасдиқланади. Унда қуйидагилар назарда тутилган:

• техник жиҳатдан тартибга солиш соҳасидаги норматив ҳужжатлар ва бошқа норматив-ҳуқуқий ҳужжатлар талабларига маҳсулотларни номувофиқлигини аниқлаш тартиби;
• номувофиқ деб топилган маҳсулотларни савдодан чақириб олиш, йўқ қилиш ҳамда уларнинг рўйхатини юритиш тартиби;
• маҳсулотларни олиб киришни қайта тиклаш тартиби.