Германиядаги ҳукмрон партия Россия ва Украина урушида дипломатияга чақирди

Клингбайлнинг фикрича, Украина «Россия томони билан музокарага киришиши учун» ҳарбий жиҳатдан мустаҳкамланиши керак.

Ларс Клингбайл / Фото: dw

Германияда ҳукмрон Социал-демократик партия ҳамраиси Ларс Клингбайл Россия ва Украина ўртасидаги урушни дипломатик йўл билан ҳал этиш тарафдори эканини айтди. Клингбайл тегишли позицияни 15 январь, якшанба куни Социал-демократик партиянинг Майнцдаги янги йил қабулида билдирди.

«Баъзида мунозаралар фақат қуроллар атрофида кечаётганини кўрганимда бошим айланиб кетади», деди Клингбайл. «Бизнинг замонамизда дипломатия тушунчасига деярли нафрат билан қаралаётганини кўриб ҳайратда қолдим», — дея қўшимча қилди у.

Социал-демократик партия ҳамраиси сўзларига кўра, у Германия Киевни зирҳли транспортёрлар билан таъминлаётганини 100 фоиз қўллаб-қувватлайди. Украина «Россия томони билан музокарага киришиши учун» ҳарбий жиҳатдан мустаҳкамланиши керак, деб ҳисоблайди Ларс Клингбайл. Унинг сўзларига кўра, Социал-демократик партия ўз пайтида Германия федератив республикасининг собиқ канцлери Вилли Брандт томонидан эълон қилинган йўналишга амал қилиши керак, у партия «бир томондан - ҳарбий кучни, бошқа томондан - дипломатияни ҳимоя қилиши» кераклигини айтганди.

Бундестагдаги Социал-демократик партия фракцияси ўтган ҳафта Россия ва Украина ўртасида тинчлик келишувига эришиш учун дипломатик ташаббусга умид қилаётганини айтди. «Чунки биз биламизки, урушлар одатда жанг майдонида тугамайди», — дейилади депутатлар позицияси лойиҳасида.

Аввалроқ, 12 январь куни Украина БМТ бош котиби Антониу Гутерриш воситачилигида ўтказишни таклиф қилган глобал «тинчлик саммити» 24 февраль куни БМТнинг Нью-Йоркдаги қароргоҳида ўтказилиши режалаштирилгани маълум бўлган эди. Бу ҳақда Украинанинг Туркиядаги элчиси Василий Боднар маълум қилди. Унинг сўзларини Anadolu агентлиги келтирган.

Дипломат G20 саммитида Украина президенти Володимир Зеленский томонидан айтилган «тинчлик формуласи»ни эслади. «Туркия Украина томонидан таклиф этилган тинчлик режасини қўллаб-қувватлашини ва уни амалга оширишда иштирок этишга тайёрлигини расман маълум қилган ташқи ишлар вазири Мавлуд Чавушўғлидан миннатдорман», — дея қўшимча қилди Украина дипломатик миссияси раҳбари.

Зеленский 2022 йил сентябрида 10 банддан иборат «тинчлик формуласини» тақдим этган эди. Гап, хусусан, мамлакатлар чегараларини бузганлик учун, жумладан, санкциялар орқали жазо, давлатларнинг ўз фуқароларининг ҳаётини ҳимоя қилиш ҳуқуқи, хавфсизликни (жумладан, озиқ-овқат ва ядровий хавфсизликни), шунингдек, Украинанинг ҳудудий яхлитлигини тиклаш ҳақида борган.