Жаҳон банки Ўзбекистонда иккита қуёш фотоэлектр станцияси лойиҳаси учун 12 млн доллар ажратади

Жаҳон банки раҳбарияти Ўзбекистонда қуёш энергетикасини кенгайтириш учун молиялаштиришни маъқуллади. Бу ҳақда Spot банк матбуот хизматига таянган ҳолда хабар берди.

Фото: Kun.uz

Қарз олинган маблағлар қайта тикланадиган, экологик тоза энергия ишлаб чиқаришни кенгайтиришга йўналтирилади. Ўзбекистон 2019 йилдан бери Жаҳон банки гуруҳининг Scaling Solar дастурида иштирок этиб келади, эндиликда лойиҳа иккинчи босқичга ўтди.

Молиялаштириш ҳажми 12 млн долларни ташкил этади. Ушбу маблағ эвазига Самарқанд ва Жиззах вилоятларида умумий қуввати 440 МВт бўлган 2 та қуёш фотоэлектр станцияси қурилиб, ишга туширилади. Гап 220 МВт қувватга эга қуёш фотоэлектр станцияси лойиҳалари ҳақида кетмоқда, уларни амалга ошириш учун 2021 йил май ойида БААнинг Masdar компанияси жалб қилинди.

Инвестор улар ишлаб чиқарадиган энергия учун энг паст тарифни таклиф қилди — кВт/соат учун 1,57 цент. Қуёш фотоэлектр станциялари ишга туширилгач, йилига 1,1 млрд кВт/соатгача электр энергияси ишлаб чиқариш имкониятига эга бўлади. Уларнинг ишга туширилиши атмосферага чиқариладиган карбонат ангидрид чиқиндиларини йилига 110 минг тоннага камайтириши кутилмоқда (барча фойдаланиш даврида 3,4 млн тонна).