Толиблар ўз жангчилари сонини 200 мингга етказишини эълон қилди

Ҳозир «Толибон» ҳарбий кучлари сони Марказий Осиёнинг исталган давлатидан катта.

Фото: Anna-news.info

Афғонистоннинг «Толибон» радикал ҳаракати қуролли кучлари сони 200 минг кишига етказилади. Бу ҳақда толиблар армияси штаби бошлиғи Қори Фасиҳуддин Фитрат маълум қилди, деб хабар берди TOLOnews.

«Биз армия сонини оширишга қарор қилдик, агар Худо мадад берса, келаси йили армия сонини 150 мингдан 170 мингга оширамиз ва босқичма-босқич 200 мингга етказамиз», деди у.

2021 йил август ойида Афғонистондаги ҳокимият қўлга киритилган пайтда «Толибон» жангарилари сони 100 минг кишига етган эди.

Global Firepower Index маълумотларига кўра, Ўзбекистон армиясида 65 минг, Қозоғистонда 77 минг, Туркманистонда 35 минг, Тожикистонда 15 минг ва Қирғизистонда 25 минг нафар ҳарбий хизматчи бор. Шундай қилиб, толиблар армиясининг сони Марказий Осиё мамлакатларининг исталган армиясидан каттароқдир.